Inauterietarako kartel bila hasi dira San Pedron
Barrutiko inauterien irudi izateko proposamenak otsailaren 2ra arte bidal daitezke, eta 3an aurkeztuko dute irabazlea.
San Pedroko inauterietako artxiboko irudia. Inauteriak iragartzeko kartel lehiaketa abiatu du San Pedroko Jai Batzordeak. Irudiak otsailaren 2ra arteko epean bidal daitezke, eta irabazle izan den euskarriaren aurkezpena otsailaren 3ko 12:00etan egingo dute. Aurkeztearekin batera, barrutiko kaleetan barrena jarriko dituzte.
Batzordekideek xehetasun gehiago eman dituzte. Hala, irudiak JPG formatuan bidali behar direla zehaztu dute, jai batzordearen posta elektroniko helbidera. Derrigorrean, honako testua izan behar dute kartelerako proposamenek:
San Pedroko Inauteriak 2024
Otsailak 10, larunbata
Egun osoan zehar jaia eta algara
Kartela bidaltzearekin batera kontakturako datuak (izen-abizenak, telefono zenbakia eta posta elektronikoa) erraztu behar dituzte parte hartzaileek.
