Trintxerpeko Inauterietan konpartsa bat atera nahi?
Trintxerpeko Jai Batzordeak gogorarazi du otsailaren 1a izango dela izena emateko azken eguna. Izena ematen dutenek bilera egingo dute datorren ostegunean.
2020ko inauterietako irudia da goikoa. Trintxerpeko Jai Batzordeak ia dena prest du aurtengo Inauterietarako, otsailaren 16, 17 eta 18an ospatuko dituzte barrutiko bizilagunek. Urteroko konpartsen desfilean parte hartu nahi dutenei azken deia egin diete, otsailaren 1a (osteguna) izango baita izena emateko azken eguna.
Partaide izan nahi duten trintxerpetarrek araudi honetan dagoen fitxa bete beharko dute eta helbide honetara idatzi beharko dute gero.
Izena ematen duten guztiak bilera informatibo batera deitu dituzte, ostegunean (otsailak 1) bilduko dira, Trintxerpeko Alkateordetzan, 19:30ean.
Aldaketak ibilbidean
Aurtengo desfilean aldaketak izango direla iragarri du udalak. Izan ere, Adinberriko obrak direla eta, ibilbidea apur bat moztuko dute. Honen gaineko informazioa jaso nahi dutenek 943 34 40 34 telefono zenbakira deitu dezakete.
