2024ko tasetan hobariak eskatzeko epea, zabalik
Otsailaren 28ra arte eska daitezke hobariak, hainbat baldintza betetzen badira. Iaz 95 bizikidetza unitatek jaso zuten hobaria.
Oiartzungo Udalak gogorarazi duenez, udal tasetan hobariak eskatzeko epea zabalik dago. Hilaren 2an zabaldu zuten, eta otsailaren 28ra arte egongo da horretarako aukera. Ura eta estolderiararen tasa edo hondakinena dira hobariak jaso daitezkeenetako batzuk.
Onuradunek ez dute 2024ko hondakinen eta ur eta estolderiaren tasa ordaindu beharko., udalak gogorarazi duenez. Lau izango dira bete beharreko baldintzak:
- Oiartzunen erroldatuta egotea.
- Zehaztutako diru-sarrera kopurua (bizikidetza unitateko pertsona kopuruaren eta Langile Arteko Gutxieneko Soldataren arabera zehaztu dute) eta ondare maila ez gainditzea.
- Bigarren etxebizitzarik ez izatea.
- Udalarekin zorrik ez izatea edo ordainketa plana onartuta eta egunean edukitzea.
Iaz, 95 onuradun
Eskaerak udaleko arreta bulegoan edo egoitza elektronikoaren bitartez egin daitezke. Informazio guztia udalaren webguneko Iragarki Taulan kontsultatu daiteke.
Udal erakundeak jakinarazi duenez, dagoeneko 63 eskaera jaso dituzte aurten. Oiartzungo 95 bizikidetza unitatek jaso zuten hobaria 2023an. Iazko onuradunek aurten ere baldintzak betetzen badituzte eskaera berriz egin behar dutela gogorarazi dute.
