Emakume zinemagileen lana azaleratzen duen filma, otsailaren 1ean
'Arnasa betean' filma emango dute otsailaren 1ean. Bertha Gaztelumendi eta Rosa Zufia zuzendariekin solasaldia egiteko aukera egongo da ondoren.
Datorren ostegunean, otsailak 1, Arnasa betean filma emango dute Landetxe aretoan. 19:30ean hasiko da, eta sarrerak eskuragarri daude, 3 euroren truke. Ondoren Rosa Zufia eta Bertha Gaztelumendi (Hitzak urrian elkarrizketatu zuen) zuzendariekin solasaldia izango da.
2022ko iraila eta abendua bitartean filmatu zen Euskal Herriko hainbat herritan (Donibane Lohizune, Pasai Donibane, Elantxobe, Hondarribia, Jaizkibel, Iruñea, besteak beste), Madrilen eta Menorcan. Arnasa betean. A pulmón filmak atzoko eta gaurko euskal emakume-zinemagileek egindako zinean murgiltzea proposatzen du. Hamasei emakumezko zuzendarik hartzen dute parte.
Bere filmen gaiaren, begiradaren, ametsen, aurrera atera beharreko ahaleginen eta, batez ere, zinemari egindako ekarpenaren aitzinean gaude. Bidaia honetan hiru urpekari izango dira gidari: Erea Lopez, Lara Larrañaga eta Ainhoa Incognito.
Filmak Deustuko Unibertsitateko ikertzaile Pilar Rodriguezen begirada ere jasotzen du, eta Ur Joko Elkarteko (Donibane Lohizune) Elorri Arin, Morgane Baud, Ainhoa Etxenik eta Ihintza Urtxegi arraunlariak ditu tartean.
Sinopsia
Azkenean hasi da emakumeen ahotsa zineman entzuten. Atzoko eta gaurko euskal zinemagileak protagonista dituen dokumental honekin ospatzen dugu, gaiaren ikuspegi unibertsala dakarkiguna.
Hiru urpekarik itsaspeko bidaia batean barrena eramanen gaituzte, emakumeek zuzendutako zinemaren bidez, eta haien filmen gaiak, pertsonaiak, haien begirada, ametsak, aurrera ateratzeko ahaleginak eta, batez ere, zinemari eta gizarteari egiten dioten ekarpena erakusten dizkigute.
Aitzindariak ezagutuko ditugu, eta azken jaialdietan arrakasta izaten ari diren zinemagile beteranoen edo gazteen lanak harrituko gaituzte.
