Gizon bat atxilotu dute Pasaian, ustezko droga trafiko delitu batengatik
Hiru kilogramo kalamu atzeman ditu Ertzaintzak haren etxean. 33 urte ditu atxilotutako gizonak.
Segurtasun sailak jakinarazi berri duenez, Ertzaintzak 33 urteko gizon bat atxilotu zuen asteartean Pasaian, ustezko droga trafiko delitua leporatuta. Hiru kilogramo kalamu atzeman zituzten (ontzitan banatuta) agenteek haren etxean. Horrez gain, oraindik baloratu ez duten haxix kopuru bat ere aurkitu zuten, baita etxe barruan landareak hazteko beharrezko elementuak ere.
Udaltzaingoak eman zuen abisua. Sarrerako atea zabalik zegoelako eta haien deiei barrutik inork ez zuelako erantzuten sartu ziren udaltzainak atxilotutako gizonaren etxera, kalamu usain “handia” sumatu zutela diote Segurtasun saileko iturriek. Itxura guztien arabera kalamua zuten kristalezko ontziak eta landareak hazteko eta manipulatzeko tresneriarekin egin zuten topo barruan. Ertzaintza agertu zen gero, eta patruila batek eraikineko atarian aipatutako etxean bizi zen pertsona aurkitu zuen. Atxilotutako gizonak berak aitortu omen zuen kalamua hazten zuela, eta une horretan bostehun gramo inguru eta beste berrehunen bat gramo haxix egongo zirela aitortu zuela diote Ertzaintzaren iturriek. Agenteek unean bertan atxilotu zuten, ustezko droga trafiko delitua leporatuta. Errenteria-Oreretako Ertzain etxera eraman zuten atxilotutako gizona.
Atzo goizean miatu zuten agenteek atxilotutako gizonaren etxea, bere abokatuaren aurrean. Barruan aipatutako sustantziak aurkitu zituzten hainbat gela eta armairutan banatuta. Horrez gain, kalamua hazteko beste hiru armairu, aireztatzeko eta usainak iragazteko sistema eta landareak barruan hazteko ohikoak diren elementuekin ere egin zuten topo.
