Gurutzeko ur-araztegia konpontzen hasi dira
Instalazio berriari esker, inguruko etxebizitzetako eta ostalaritza-jardueretako hondakin-urak behar bezala tratatu ahal izango dira.
Udaleko eta Añarbeko Urak-eko ordezkariek bisitatu dituzte obrak. Añarbeko Urek eta Oiartzungo Udalak jakinarazi dutenez, hasi dira Gurutzeko hondakin-uren araztegia (HUA) birmoldatzeko lanak Oiartzunen. 2010ean zabaldu zuten, eta ordutik inguruko etxebizitzetako eta ostalaritza establezimenduetako hondakin-uren isurketak bildu eta tratatzen dira.
“Instalazioa zaharkituta geratu da gaur egungo karga kutsatzailea tratatzeko”, azaldu dute. Duela hiru urte aldaketa txiki batzuk egin zituzten, baina inbertsio handiagoa behar zuela erabaki zuten.
Bi erakundeetako buruak —Joana Mendiburu Oiartzungo alkatea eta Jose Angel Ercilla, Añarbeko Urak-eko zuzendari gerentea— izan dira lanak bisitatzen.
Helburuak
Gurutzeko ur-araztegiaren jarduera nagusiak zerrendatu dituzte: egungo biodisko bidezko arazketa-sistema (populazio txikiei zerbitzu emateko oso hedatua) ordeztea aireztapen luzearen bidezko erreaktore biologikoko sistema klasiko batekin, ponpaketa-putzu bat eraikitzea eta dekantagailua handitzea.
“Instalazioa hobetzeko beste jarduera batzuk ere egingo dira, hala nola instalazio elektrikoa birmoldatzea, prozesua automatizatzea eta dagokion kontrol-gela”, azaldu dute.
Kokapena berbera izango duenez, egungo araztegiaren hainbat funtzio zerbitzuz kanpo geratuko dira, otsailaren erdialdetik apirilaren erdialdera bitartean. “Epe horretan, aurretratamenduaren fasea bakarrik egongo da martxan (elementu solidoak hondakin-uretatik kentzea), eta errekara isurtzen den urak ohikoa baino karga kutsatzaile handiagoa izango du, nolanahi ere, araztegirik ez balego izango lukeena baino txikiagoa”, iragarri dute.
Behin obrak bukatuta, instalazioak behar bezala garbituko dituzte. Hartara, Gurutze auzotik datozen hondakin-urak, eta, era berean, Uraren Euskal Agentziak emandako isurketa-baimena beteko dela ziurtatu dute.
