Agintaldi Plana aurkeztuko diete pasaitarrei asteazkenean
Datozen lau urteetarako udal gobernuak osatu duen bide orriaren xehetasunak emango dituzte Juanba Berasategi aretoan. Gutxienez 100 neurri gauzatzeko konpromiso publikoa hartuko dute ordezkariek.
Pasaiako udal gobernua osatzen duten bederatzi zinegotziak. Datorren asteazkenean (hilak 31), Pasaiako udal gobernuak 2023-2027 ekitaldirako landu duen Agintaldi Plana aurkeztuko dute publikoki. Pasai Donibaneko Juanba Berasategi aretoak jasoko du saioa, 19:00etan abiatuko dute.
Bertan, agintaldiko lehentasunen berri emango dute Teo Alberro alkateak eta gobernuko gainerako zinegotziek, udaleko iturrien arabera, “gutxienez 100 neurri zehatz gauzatzeko konpromiso publikoa hartuz”.
Bertaratzeko interesa duten pasaitarrek udalari jakinarazi beharko diote aurretik. Helbide honetara idatzi beharko da, izen-abizenak zehaztuz. Aurkezpenaren ondoren mokadutxoa eskainiko diete bertaratutako pasaitarrei.
