Hamabost puntu izango ditu urteko lehenengo udalbatzarrak
Herriko kirol instalazioen dagozkien bi puntu aztertuko dituzte. Gainera, Ugaldetxo auzoko kale bati izena aldatzea proposatuko dute.
German Ugarte kaleari beste izena bat jartzea proposatuko dute [Arg.: Google]. Oiartzungo udalbatza lehen aldiz elkartuko da plenoan 2024. urte honetan. Hileko azkeneko egunean izango da. Hamabost puntuk osatzen duten gai-zerrenda izango dute esku artean, eta tartean izango dira herriko kirol instalazioei dagozkien bi puntu.
Gainera, Altzibarren hamabi etxebizitza tasatu esleitzeko oinarriak izango dituzte hizpide.
Ezohiko gai bat aztertuko dute, bestalde. Ugaldetxo auzoko German Ugarte kaleari izena aldatzeko proposamena landuko dute. Oiartzungo bikario izan zen, eta Inkisizioarekin zerikusia izan zuen, Lope Isasti bere lagun eta kronistak azaldu zuenez.
Plenoa 18:00etan hasiko da, eta honakoa izango da gai-zerrenda osoa:
- Aurreko batzarrari dagokion aktaren onarpena.
- ALT-6 eremuko 12 etxebizitza tasatuen esleipen-oinarriak onartzea.
- Oiartzungo Udal Ikastola Partzuergoari 2024. urteko ekarpena onartzea.
- Udala eta Haurtzaro Ikastolaren arteko hitzarmenaren arabera, 2024 urteko mantenu gastuetarako diru-laguntza ordaintzea Haurtzaro Ikastolari.
- Udal eraikinen garbiketa kontratuaren bigarren luzapena.
- Elorsoro Kiroldegia, Madalensoro pilotalekua eta udako igerilekua udal instalazioen zerbitzu emakida kontratuaren oreka ekonomikoa berreskuratzea.
- Ugaldetxo auzoko German Ugarte kalearen izen berriaren proposamena.
- Bidaiariak auto-taxiz garraiatzeko zerbitzuaren 2024. ekitaldiko hiri tarifen onarpena.
- Organo kolegiatuetako udalaren ordezkarien izendapena aldatzea, Elizalde Herri Eskolari (DBH) dagokionez.
- 2024ko kontratazio planaren onarpena.
- 2023ko kontratazio planaren emaitzaren berri ematea.
- 2024. urteko diruzaintza-planaren berri ematea.
- Oiartzungo Elorsoro kiroldegia, Madalensoro pilotalekua eta Udako Igerilekua energia elektrikoz eta Elorsoro kiroldegia gas naturalez hornitzeko kontratua esleitzeko eskumena alkateak berreskuratzeko erabakiaren berri ematea.
- Beste organoen jardueraren jarraipena.
- Eskari-galderak.
