[Irudiekin] Ba heldu dia
Urteko astebururik magikoena hasi berri da Oiartzunen. Intxixu, basandere eta sorginek bere legea ezarri dute jendez lepo zegoen plazan.
Eskola-orduak bukatu eta berehala sumatu da festarako egarria zegoela plaza inguruetan. Astea atzean utzi berri duten ikasleek Burrunba egin dute Beheko Plazatik Done Ezteberaino, ihoteei deiadar eginez.
Zarata sortzeak izan du bere saria, eta txokolatea —gaur baimenduta zegoen— izan da arratsaldeko lehen protagonista. Ondoren iritsi dira herri dantzak, baita Azeri eta Sorgin dantzak ere.
Sorgin dantzatik sorginen etorrerara pasatu dira. Ondoren etorri dira intxixu eta basandereak. Plazan, gidoitik atera gabe baina ezaugarritzen dituen puntu anarkiko horrekin, dantzan aritu dira. Ondoren, ardurak banatu dituzte, batzuk sokara, tira egitera, eta beste batzuk udaletxe ingurura, guztien artean hura hartzeko.
Oiartzungo zortzi auzoen koloreekin jantzi da udaletxeko fatxada, eta horrekin batera, festa giroa sendotu da. Zakukada bat sorpresa ekarriko ditu gauak, biharko kuestazioari bide eman aurretik.
Heldu dira, heldu, ihoteak!
Larunbata
- o9:00etatik aurrera: Auzoetan Kuestaziyua, poxpolinez jantzita.
- 14:30ean inguruan: Bazkaria. Auzo bakoitza bere elkartean.
- 18:00etan: Auzoetan ibilitako kuadrillak plazan elkartuko dira.
- Ondoren: Musika eta festa giroa Kataxuloko txosna inguruan.
Igandea
- o9:00etan: Diana txistulariekin.
- 11:00etan: Beheko Plazatik karroxa eta kalejira alaia.
- 12:00etan: Dantza gidatuak plazan.
- 19:00etan: Intxixu, basandere eta sorginei agurra.
- Bukatzeko, Suzko Akerra.
