Eskualdeko antzerkilari txikienek zita izango dute Oiartzunen
Oarsoaldeko Antzerki Uztaren bigarren topaketa egingo dute martxoko lehenengo larunbatean. Antzerkiaren lotutako jolasak egin eta emanaldi bat ikusiko dute.
Eskualdeko antzerkilari txikiak oholtzatik plazara aterako dira martxoaren 2an. Oarsoaldeko antzerkilari txikienak martxoaren 2an elkartuko dira Oiartzunen. Oarsoaldeko Antzerki Uzta bigarren aldiz egingo dute, eta lau udalerrietako antzerki eskoletako 7 eta 9 urte arteko ikasleen topagune izango da, modu dibertigarrian.
Iaz Lezon egin zuten topaketa, eta herriz herriz ibiliko da; aurtengoa Oiartzunen izango da. “Ume antzerkilariak elkar ezagutu, elkarrekin antzerkian jardun eta elkarren jakintza eszenikoaz eta sortzaileaz gozatzeko sortua da”, adierazi dute antolatzaileek.
Pasaiako Badia eskolako, Lezoko Orratx! antzerki taldeko, Errenteriako Herri Arte Eskolako eta Oiartzungo antzerki eskolako kideak Landetxe inguruan elkartuko dira, martxoaren 2an, 11:30ean. Zenbait tailer antolatu dituzte, antzerkiarekin gozatzeko: gorputza, mugimendua, ahotsa eta dramaturgia.
Bazkaldu ondorenerako elkar ezagutzeko jolasak prestatu dituzte. Eguna biribiltzeko, beste plan bat antolatu dute: Landetxeko auditorioan Muna antzerkia ikusteko aukera izango dute. Emanaldia bukatu bezain laster, antzezleekin solasaldi txiki bat edukitzeko aukera izango dute ikasleek.
“Iazko arrakasta eta balorazio ona ikusita, aurtengoa ere uzta oparoa izango dela espero dugu. Horrela, datozen urteetan loratuko dira topaketa eta antzezle berriak”, iragarri dute.
