Indartsu dator martxoko agenda, Korrikak eta bestek puztuta
Martxoko agenda ekitaldiz beteta dator. Korrika Kulturalak, Literatura Plazara-k eta ohiko ekitaldiek elikatuko dute.
'Muna' antzezlana ikusi ahal izango dute haurrek datorren larunbatean. Oiartzungo eragile eta erakundeek antolatutako ekitaldiek elikatzen dute hileroko agenda. Korrika Kulturalak dezente puztu du ekitaldien kopurua, baita hilabete hasierako Literatura Plazara iniziatibak ere. Martxoaren 8ak ere bere pisua izango da ekarpenean.
Ezohiko ekitaldi batekin hasiko da ekitaldien zerrenda: Fermiñene Gizarte Ongizate Sailaren egoitza moduan inauguratuko duen ekitaldiarekin. Datorren asteburua jardueraz lepo etorriko da; tartean izango da Oarsoaldeko Antzerki Uzta. eta hilabete osoan hainbat ekitaldi izango dira, asko eta asko Korrika Kulturalari lotutakoak.
Beste batzuk ohikoak izango dira, (ia) hilabetero egiten direnak: ipuin-kontaketa, filmen emanaldiak, kontzertuak, Irakurketa Taldearen solasaldia… Gainera, udaberriko oporrak izango dituzte haurrek, eta horren harira, ekitaldi gehiagorekin gozatzeko aukera izango dute.
