Etxegabetu nahi dituzten trintxerpetarren egoera salatzeko asanblada egingo du Etxebizitza Sindikatuak
Eskalerillas ondoan eraitsi nahi duten blokeko bizilagunen egoeraren inguruan ariko dira. Bide batez, babesa adieraztera eta borrokara batzera deitu dituzte herritarrak.
Otsaila erdialdean Etxebizitza Sindikatuak deitutako elkarretaratze baten irudia. Eskalerillas ondoko bloketik kaleratu nahi dituzten bizilagunen egoera salatu eta aferaren gaineko informazioa emateko asanblada irekia egingo du Oarsoaldeko Etxebizitza Sindikatuak datorren asteartean (hilak 5). Trintxerpeko alkateordetzan bilduko dira, 18:45ean. Babesa adieraztera eta borrokara batzera deitu dituzte herritarrak.
Joan den hilean hasi zuten borroka bizilagunek, Pasaiako Portuko Agintaritzak hamarkada luzez eurenak izan diren etxebizitzak eraitsi nahi dituelako, garraiorako trenbide berri bat eraikitzeko. Lotura honetan proiektuaren eta aferaren gaineko erreportajea irakur daiteke, joan den otsailaren 23an HITZAk argitaratutakoa.
