Altzibarko etxebizitza tasatuetan izena emateko epea, irekita
Apirilaren 14ra arte eman ahal izango da izena Altzibarren eraikiko dituzten etxebizitza tasatuetan. Hainbat baldintza bete beharko dira.
Joana Mendiburu alkatea eta Agustin Lekuona Hirigintza zinegotzia, etxebizitzak eraikiko diren eremuan. Oiartzungo Udalak duela gutxi jakinarazi zuen Altzibarren etxebizitza tasatuak eraikitzeko proiektua aurrera doala.
Iragarri dutenez, hilabetea hastearekin batera zabaldu da etxebizitza horietan izena emateko epea. Agerrealde eta Aduriz artean egingo dituzten hamabi etxebizitza tasatuen zozketan sartu nahi dutenek apirilaren 15era arte izango dute eskaerak aurkezteko epea.
Bete beharreko dokumentua udaletxean edo webgunean eskura daiteke, Tramiteak saileko Eskaera orriak atalean.
Udaletxeko harreran aurkeztu daitezke eskaerak (astelehenetik ostiralera 8:00etatik 14:30era) edo erregistro elektroniko bidez. Udalak gogorarazi duenez, kasu gehienetan, eskaera orriaz gain ez da beste dokumenturik aurkeztu beharko. Izan ere, udalak egingo ditu sektore publikoko entitateekin beharrezkoak diren egiaztapenak eta kontsultak (eskatzaileak kontrakorik adierazten ez badu).
Baldintzak
Bina logelako bost etxebizitza (70 m2 ingurukoak); hiruna gelako sei (87 m2-koak) eta izaera iraunkorreko desgaitasuna duten pertsonentzat egokitutako beste bat izango dira. Garajea eta trastelekua izango dute denek. Hainbat baldintza bete beharko dira etxebizitza esleitzeko. Honakoak dira:
- Adina: Adinez nagusia edo adingabe emantzipatua izatea.
- Errolda: 2024ko urtarrilaren 1etik Oiartzunen erroldatuta egotea, azken hamabost urteetan bost urtez erroldatuta egon izana edo azken hamar urteetan herrian etenik gabe lan egin izana. Errolda baldintza betetzen dutenek lehentasuna izango dute lan baldintza betetzen dutenekiko. Genero indarkeriaren biktima izan diren emakumeei ez zaie erroldatuta egotea eskatuko.
- Baldintza ekonomikoak: Bizikidetza-unitateak 15.000 euro eta 50.000 euro bitarteko diru-sarrera haztatuak (ponderatuak) izatea.
- Ondarea: Etxebizitzarik ez izatea (salbuespenak egongo dira, etxebizitza edukita ere bizikidetza-unitatearen beharretarako egokia ez izatea edo banaketa kasuetan, besteak beste).
Informazio gehiago nahi dutenek udaletxera dei dezakete (943 490 142).
