Martxoaren 8aren harira adierazpena landu du Lezoko EAJk
Laura Martinez: "Genero desberdintasuna, bere adierazpen ugarietan, gaur egun aurre egin behar diogun erronka nagusietako bat da, nagusiena ez bada".
Alaitz de la Maza eta Laura Martinez Lezoko EAJko zinegotziak. Lezoko EAJk, Laura Martinez Lezoko Udaleko bozeramailearen bitartez, Martxoaren 8aren harira adierazpena landu du. Haren arabera, emakumeen eta gizonen arteko “berdintasun fisiko eta eraginkorra” funtsezko eskubidea da pertsona guztientzat, “funtsezko balioa demokraziarentzat eta funtsezko eta beharrezko faktorea Euskadiren giza, gizarte eta ekonomia garapenerako. Genero desberdintasuna, bere adierazpen ugarietan, gaur egun aurre egin behar diogun erronka nagusietako bat da, handiena ez bada”. Lezoko Udalak herriko eragileekin landutako egitarauaren barruko ekitaldietan parte hartzera deitu dituzte lezoarrak, “emakumeen ikusgarritasunarekin aurrera egiteko formularik onena lankidetza eta inplikazio soziala dira”.
Jeltzaleen ustez Emakumeen Egunean testuinguru egokia ematen da berdintasunaren bidean egindako lorpenak aztertu eta egiteko dagoena aldarrikatzeko. Gainera, Lezoko EAJk nabarmendu du arrastoa utzi duten emakumeek egindakoa gogorarazi behar dela, “haien balioa, jakintza eta determinazioa aitortzeko unea da”.
Emakume guztientzako etorkizun hobea eraikitzeko duen konpromisoa irmo defendatu du alderdiak. “Martxoaren 8a etorkizunean ospakizun eguna izatea nahi dugu, non emakumeek eta gizonek berdintasunaren arloan egindako aurrerapenak partekatuko ditugun, gizarte inklusibo, ekitatibo eta oparoa lortzeko”.
