Udal Gobernuaren Agintaldi Planaren balorazioa egin du EAJk
Pasaiako EAJk Udal Gobernuaren proposamen berrien falta azpimarratu du besteak beste Agintaldi Planaren balorazioan.
Pasaiako EAJko kideen artxiboko irudia. Duela hilabete baino zertxobait gehiago egin zuten Pasaiako udal gobernuak 2023-2027 ekitaldirako osatu duen Agintaldi Planaren aurkezpena, eta “pasaitarron bizi baldintzak hobetzeko beharrezkoak diren proiektuei” dagokienean, hainbat ideia azpimarratu ditu Pasaiako EAJk ohar batean.
Proposamen berriak badaudela dio EAJk, eta batzuk interesgarriak direla, baina gehienak oinordetzan jaso edo prestamoan hartuak direla kritikatu dute. Horretaz gain, zainketen publifikazioari buruz “ezer ez aipatzeak” harritu egin dituela gehitu dute.
Bestalde, adierazi dute “alarmaz” ikusten dutela dokumentuan ez agertzea gauzak nola eta zein aurrekonturekin egingo dituzten argitzen duen xehetasunik.
Gainera, salatu dute Pasaiako etxebizitza guztietan publizitatea egiteko egunkari bat postontzietan banatzeko gastatutakoaren informazioa idatziz eskatu dutela, baina ez zaiela ezer iritsi.
Aitzitik, saltokietarako apaingarrien ordenantza “interesgarria” iruditu zaio EAJri: “Proposamen egokia, baina mugatuegia eta kontraesankorra. Nahiz eta ados gauden apaindura-ordenantza bat garatu behar dela lokalak itxura onean egon daitezen, zoritxarrez merkataritza-jarduera eteten denean, guztiz eskasa eta kontraesankorra iruditzen zaigu establezimenduei eskatzea beren erakusleihoak egoera ezin hobean eduki ditzatela”.
