Bihar eta etzi, Oiarperen urteurrena ospatzeko zitak
Hiru partidako pilota jaialdia antolatu dute ostiral arratsalderako, Madalensoron. Larunbatean, bazkaria, toki berean.
Oiartzungo esku huskako klubak hogei urte bete ditu. Ospakizunei ginga jartzeko asmoz, hainbat ekitaldi antolatu dituzte datorren astebururako.
Biharko —ostirala, hilak 22— pilota partiden jaialdia antolatu dute. 21:00etatik aurrera, hiru partida ikusi ahal izango dira. Lehenengoa Haurren Mailakoa izango da, mistoa. Adur Martinez eta Aiur Apezetxea eta Eritz Egiguren eta Jare Ziaurritzen kontra arituko dira.
Beste bi partidetan aldaketatxoak izango dira. Bigarren partida Oiarpeko Leonet eta Zabaletak jokatuko dute, elkarren kontra.
Azkeneko partida bikoteka izango da. Landa oiartzuarrak Iker Egiguren azpeitiarrarekin batera jokatuko du, eta arerioak Eñaut Lizeaga astigartarra eta Markel Lizeaga hernaniarra izango dira.
Sarrerak salgai jarriko dituzte Madalensoro pilotalekuko txarteldegian, 10 —sarrera orokorra— eta 5 euroan —bazkideentzako—.
Bestalde, larunbatean pilota elkartearen bueltako komunitateak bazkaria egingo du frontoiko kantxan.
