Sexu jazarpenaren aurkako protokoloa onartu dute plenoan
Martxoko plenoa egin dute. Iaztik geratu zen gerakinaren berri eman dute, eta inbertsioetara bideratuko dela jakinarazi dute.
Atzora aurreratu zuten martxoko plenoa. Oiartzungo udalbatzak atzo egin zuen martxoko plenoa. Hamabi puntuko gai-zerrendarekin iritsi ziren plenora, eta bat gehiago sartu zen azken orduan.
Sexu-jazarpena eta sexuan oinarritutako jazarpenaren zein bestelako diskriminazio kasuen kontrako protokoloa onartu zuten, aho batez.
Joana Mendiburu alkateak azaldu zuenez, lege eta araudiek hala aginduta, erakundeek gisa horretako protokoloa izan behar dute. Oiartzunen kasuan atzo izan zen indarrean jarri zen eguna. “Lan mardula da, udaletik kanpoko teknikariek egindakoa, eta hemengoek gerora berrikusitakoa”, gaineratu zuen alkateak.
Udalaren helburua da sexu-jazarpena edota sexuan oinarritutako jazarpenaren ondoriozko kaltea detektatu —ikusezin bihur daiteke eremu horretan—, artatu eta erreparatzeko. “Gainerako politika feministekin eta lan-arriskuen prebentziorako politikekin batera, udala ere diskriminaziorik gabeko lan-gune feminista eta berdinzalea izateko tresna izango da”.
Iazko gerakina
Iazko aurrekontuaren likidazioaren berri eman zuten. 4.907.027,63 euro da soberakin kopurua. Diru kopuru horiek jada txertatuta daude. Hainbat proiektu finantzatzeko erabiliko dira: jasangarritasun energetikorako proiektuetarako, kultur eragileek antolatzen dituzten ekintzak diruz laguntzeko, Rafael Pikabea hiribidea berritzeko edota Altzibarko frontoia…
Soinuenea eta URA
Soinuenea Fundazioari bideratu beharreko urteroko diru-partida ere izan zuten hizpide. Aurten ia 109.000 euro bideratuko dizkiete. Herri musikaren ikerketa, trebakuntza, bilketa, kontserbazioa eta dibulgazioarekin “jarraitzea” da horren helburua. Hango langileen soldata igotzea aurreikusten du laguntzak, %3,3 zehazki.
Gai-zerrendatik kanpo URA Agentziarekin egindako hitzarmena sartu zen. Uraren zikloaren digitalizazioa hobetzeko prozesua finantzatzeko 16.239 euro jarriko ditu udalak, eta 59.736 euro URAk, Next funtsen bidez. Honakoa izango da helburua: hornidura-sistemaren digitalizazioak erauzitako emariak denbora errealean monitorizatzeko aukera ematen du, eta horrek aukera ematen duelako ur-masak babestuz jarduteko eta gerora gerta daitezkeen arazoak prebenitzea. Sistemako ihesak, galerak edo kutsadurak ere detekta ditzake.
