84 txirrindularik jantziko dute OTXEren maillota aurten
Inoiz baino kirolari gehiagorekin abiatu du denboraldia Oarsoaldeko txirrindularitza taldeak. Errepideetan zein mendi pistetan izango diren txirrindulariak aurkeztu zituzten atzo.
Denboraldia hasi berri den honetan, dagoeneko lehiatzen hasi diren txirrindulari guztiak aurkeztu zituen atzo OTXE Oarsoaldeko Txirrindularitza Eskolak, Pasai Donibaneko Juanba Berasategi aretoan. Banan-banan, kategoria guztietako taldeak igo ziren oholtzara, denboraldian zehar errepidetan zein mendi pistetan izango direnak, aurten estreinatuko duten maillot berriekin (berdea eta arrosa).
Mikel Astarloza txirrindulari ohiak egin zituen aurkezpen lanak, eta harekin batera izan zen Arkaitz Iza presidentea. Urtez urte goraka joan den proiektua da OTXE eta aurtengo zenbakiek hori berresten dute, inoiz baino txirrindulari gehiago baitituzte taldean; 84 orotara: “Hamargarren denboraldia dugu aurtengoa, zazpi txirrindularirekin hasi ginen eta hamar urteren ondoren, 84 gara. Zenbaki potoloak dira hauek. Gainera, hasi ginenean ez genuen neskarik, eta egun harro esan dezakegu 18 ditugula. Pozik egoteko eguna da”, esan zuen atzokoan.
Aurtengo helburuei erreparatuz, eskolakoek “ikasten eta gozatzen” jarrai dezatela nahi dute entrenatzaileek, “podiumei begiratu gabe”. Jubenilen errendimenduarekin “harrituta” daudela aitortu zuen Izak eta mundial bat jokatzeko aukerak izan ditzaketela taldekoek. 23 urte azpikoen taldeko batzuk ere mundialari begira daudela esan zuen, harro.
Atzoko emanaldian, kirolari eta entrenatzaile guztiez gain, babesleak ere izan ziren. Haiekin batera, besteak beste, Abraham Olano txirrindulari ohia eta Julen Rodriguez kirol zinegotzia izan zen, eskualdeko lau udaletxeen izenean.
