Korrika guztiek harro goza dezaten, gaur, bihar eta etzi
Korrika azken txanpan sartu da, baina Oiartzunen onena iristear dago. Bihar eta etzi arteko gauean pasatuko da herritik, aurretik eta ondoren giroa sortuz. Gaur, Korrika Txikia eta Gaztearen txanda.
2022an egin zuten Korrika Txikiko irudia. Astebete luze pasatu da Korrika Oiartzundik bertantsu hasi zenetik. Ordutik, helburu komuna partekatzen duten milaka zorok Remigio Mendiburuk sortu eta Juan Gorritik birpentsatutako lekukoaren segizioa osatu dute kale, mendate, kostaldeko bide zein sakabanatuta dauden herrien arteko bukaerarik gabeko errepideetan barrena. Oiartzun izkin egiten aritu ondoren, bihartik igandera bitarteko gauean iritsiko da —azkenean— Aiako Harriaren alde honetara. Itxaronaldia bukatu da.
Hala ere, lehenago hasiko dira herria girotzen. Izan ere, atzo arratsean bertso poteoa egin zuten, Landetxetik hasita. Lehenengo aperitiboa besterik ez zen izan. Izan ere, gaur arratsaldean jarraituko dute Korrikaren aurrekoek. Bazkaldu ondoren, baina liseriketa prozesuari aukera pixka bat emanez, Korrika Txikia egingo dute. 14:50ean jarri dute zita, Elizalde ikastetxearen eta Haurtzaro Ikastolaren arteko lotunean: Beheko Plazako biribilgunean. Bertatik aterako da, baina lekuko aldaketarako prest egongo diren ikasleak Oiartzungo kaskoa eta beheko auzoak lotuko dituen ibilbidean izango dira.
Ikasleek modu bikainean hasiko dituzte oporrak, korrika ibili ondoren askaria banatuko baitiete Done Eztebe plazan. Bertan, eskolaz kanpoko jardueren erakustaldi bat ikusteko aukera izango dute, Korrika Gazteari lekukoa pasatu baino lehen. Hori bai, Uxue, Garazi eta Malenen eskutik beroketa gidatua egingo dute, korrika abiatu baino lehen. Pintxopotea izango da indarrak berreskuratzeko erabiliko duten muzin ezinezko formula.
Gaurkoa ikasle eta koskortuago dauden gazteei zuzendutako eguna baldin bada, bihar adin guztiei begirako egun handia izango da. Edo egun handiak idatzi beharko da, larunbata eta igandea bilbatuko baititu Korrikaren 23. ekitaldiak. DJ Txillardegik jarritako musika izango da trantsizio horren soinu-banda.
Eguerditik hasiko da Korrikak hain berezko duen giroa nabaritzen: dultzaineroek, lehendabizi, eta mutxikoek, ondoren. Petoak banatuko dituzte gero, lekukoa eraman behar dutenen artean. Siestan geratzeko aitzakiarik ez dute edukiko gurasoek, zirku tailerra egingo baitute, baita Pirritx, Porrotx eta Marimototsek emandako pagoa landatu ere. Arratsean musikaren txanda izango da, eta Korrika Arraguara iritsi baino lehen, Luix Mitxelenaren martxarekin berotuko dute hauspoa.
00:27. Hori da O ordua. Oreretarrek ez badute lekukoa osten, orduan iritsiko da Korrika Oiartzunera. Zehazki, Arraguara. Ondoren etorriko dira gurutzatuko dituen beste lau auzoak: Ugaldetxo, Elizalde, Altzibar eta Ergoien. Guztira hamabi kilometro izango dira, eta, esan bezala, 32 aldiz aldatuko da eskuz esku. Eragile batzuek iragarri dute zer egingo duten. Ttur-tturrek bere lekukoa belaunaldi arteko zubi bilakatuko du, Zilibito Records eta wikilariei utzita; bretainiarrek ez dute hutsik egingo. Korrika iristear da, eta oiartzuarrek harro erakutsiko dute euskaraz bizi(ko) direla.
Egitaraua
Gaur, ostirala
- 15:00. Korrika Txikia, Beheko Plazatik abiatuta. Jarraian, askaria.
- 17:00. Eskolaz kanpoko ekintzen erakustaldia. Ondoren, plaza apainketa gazteek egindako pankartekin.
- 18:30. Beroketa gidatua: Uxue, Garazi eta Malenekin.
- 19:00. Korrika Gaztea. Ondoren, mezuaren irakurketa eta askari autogestionatua.
- 21:00. Pintxo-poteoa.
Bihar, larunbata
- 11:00. Dultzaineroak.
- 12:00. Mutxikoak.
- 13:00. Argazki ofiziala lekuko eramaileekin.
- 16:30. Zirku tailerra. Bitartean, puzzlea margotzea eta murala osatzea.
- 18:30. Pirritx, Porrotx eta Marimototsen pagoaren landaketa, Arizmendin.
- 19:30. June Galardiren kantaldia.
- 22:30. DJ Txillardegi. Afari autogestionatua.
- 00:15. Beroketa gidatua, Luix Mitxelenarekin.
- 00:27. Korrikaren iritsiera, Arraguan.
- Korrika pasatzean. DJ Txillardegik pintxatzen jarraituko du.
