Eragileek antolatutako kultur ekitaldietara 96.000 euro bideratuko ditu udalak
Herriko eragileek 34 ekintza proposamen egin dituzte, eta horiek guztiak onartu ditu udalak. Hasierako partida handitu dute.
Garazi Urdanpilleta alkateordea, kultur ekitaldi askoren aterpe den Landetxeren aurrean. Herriko eragileek urtarrila izan zuten kultur ekintzak diruz laguntzea eskatzeko. Kontzertuak, erakusketak, antzezlanak eta abar antolatzeko deialdia izan zen.
Oiartzungo Udalak 75.000 euroko partida gorde zuen horretarako. “2023an 43.250€ banatu zituen eta orduan aurkeztutako proposamenen aurrekontua 75.000 euro izan zenez, %73 handitu zuen urte honetarako aurreikusitako diru-partida, ekintza denak diruz laguntzeko aukera izateko”, azaldu du udalak.
Deialdian 34 proposamen aurkeztu zituztela jakinarazi du udalak, eta horiek guztiak onartu dituztela. 75.000 euroko aurrekontua gainditu zutenez, partida “indartzea” erabaki duela jakinarazi dute. 21.713 euro gehiago bideratuko ditu, eta guztira 96.713 izango dira. Pasa den asteazkeneko plenoan onartu zen kreditu aldaketa hori.
“Guztiek ematen diote bizia Oiartzuni”
Garazi Urdanpilleta alkateordeak “pozik” jaso ditu proposamen horiek guztiak, “inoiz baino gehiago” izan baitira. Oiartzun “herri bizi eta sortzailea” dela nabarmendu du.
“Kultur eragileek egin dituzten proposamen guztiek ematen diote bizia Oiartzuni. Euskaratik eta feminismotik egindako proposamenak izan dira asko eta asko. Oiartzunen balio hauek dituen kultura eskaintza sustatu nahi dugu”, adierazi du.
34 proposamenak onartzeko diru-partida handitzeari buruz aritu da Urdanpilleta. Bere esanetan, elkarteetan egiten den “inurri lana” aintzatetsi nahi izan dute.
