Teknologiaren erabilera zuzena uztartzeko tailerrak, Torrekuan
Mugikorra eta ordenagailua izango dira saio horien ardatz, eta tailerrak apirilaren 9an, maiatzaren 7an eta ekainaren 4an izango dira.
Errenteria-Oreretako Torrekua eraikinean izango da jardunaldia. Teknologia Denontzat tailerrak antolatu dituzte TEKS elkarteak eta Errenteriako Udalak teknologiak gizartean sortzen duen ezagutza arrakala txikitu eta teknologiaren erabilera zuzena herritar guztien esku jartzeko asmotan; hori dela eta, antolatzaileek hiru saioren berri eman dute.
Lehenengo saioa ‘Nola babestu zure bizitza digitala: Mugikorrak’ izango da, apirilaren 9an, eta mugikorrak jasotzen dituen datuak zein diren, mugikorra nola konfiguratu eta konexio seguruak nola egin irakatsiko dute.
Bigarren saioa ordenagailuen ingurukoa izango da, maiatzaren 7an, eta ordenagailuetan norbere bilaketak nola babestu, honek zein datu jasotzen dituen eta cookieak zer diren ikasiko dute parte hartzaileek.
Hirugarren tailerra, aldiz, eguneroko tramiteak online egiten ikasteko izango da, eta hau ekainaren 4an izango da. Saio honetan osakidetzako karpeta digitala nola ikusi eta udaletxearekin nola jarri harremanetan irakatsiko diete.
Tailer horietaz gain, teknologia zalantzen txokoa ere zabaldu dute, mugikorraren eta ordenagailuaren erabileraren inguruko zalantzak argitzeko aukera emate aldera, eta bertaratzeko aukera apirilaren 16an eta 30ean, maiatzaren 14an eta 28an, eta ekainaren 11n eta 25ean egongo da.
Saio guztiak 10:00etatik 12:00etara izango dira, Torrekua eraikineko hirugarren solairuan.
