Escalerillaseko bizilagunekiko Elkartasun Eguna, apirilaren 20an
Bizilagunek eta Etxebizitza Sindikatuak aurkeztu dituzte ekitaldiak, Trintxerpen. Administrazio publikoen "erantzun eza" salatu dute.
Atzo aurkeztu zuten Elkartasun Eguna. Escalerillaseko etxeetako bizilagunek eta Oarsoaldeko Etxebizitza Sindikatuak agerraldia egin zuten atzo, bi helbururekin: administrazio publikoen “erantzun eza” salatzea, eta Elkartasun Eguna aurkeztea. Apirilaren 20an izango dela iragarri zuten.
Gogorarazi zutenez, bertan bizi diren hamabi familiei duela hilabete batzuk jakinarazi zien Pasaiako Portuak etxeetatik kaleratu nahi zituztela. Ordutik hainbat mobilizazio egin dituztela nabarmendu zuten.
“Ez dugu ahaztu behar proiektu honek guztiak gutxi batzuk are gehiago aberastu daitezen balio duela”, adierazi zuten. “Merkantziak garraiatuko dituen trenbidea eraiki nahi dute, eta, horretarako, ez zaie 12 langile familia etxegabetzea axola. Hots: beraien aberastasun metaketa ez du ezerk geldiaraziko”.
Administrazioekiko kritika
Administrazio publikoen “erantzun eza” kritikatu dute. Merkantzia trenbidearen proiektuko kide da Eusko Trenbide Sareak (Eusko Jaurlaritzaren menpekoa), eta haien partetik erantzunik ez dutela jaso jakinarazi zuten. Hauteskundeen aurreko kanpainan erantzunik jasoko ez dutela argi dute, “hitzontzikeriatik harago”.
Pasaiako Udalaren jarrera “are larriagoa” dela uste dute. “Udalerriko 12 familia etxegabetuko dituzten honetan ez baitigu hitz politez harago aterabide errealik aurkeztu”, esan dute. Posizio “argia” eskatu diote udalari: etxegabetzeen aurkakoa eta irtenbide baten aldekoa.
Elkartasun Eguna
Egoera “gordinean” mobilizatzen jarraituko dutela berretsi dute, eta apirilaren 20rako antolatutakoaren berri eman dute. Trintxerpeko Gudarien plazan izango dira jarduerak, honako egitarauarekin:
- 11:00etan: Haurrentzako jolasak.
- 12:00etan: Kazerolada.
- 14:00etan: Bazkaria.
- Ondoren, kantautore baten emanaldia.
“Egun horrek”, azaldu dute, “egoeraren berri emateko aukera emateaz gain, familiei elkartasuna adierazi eta bizitoki alternatiba bat eskatzeko ere balioko du”. Trintxerpeko zein inguruko herritarrak bertara gonbidatu dituzte.
