Arditurrik txori doinua izango du
Oiartzungo parketxeak txorien doinuekin eta izaerarekin gozatzeko hainbat jarduera antolatu ditu datozen asteetarako.
Mikel Olano (eskuinean), txorien gaineko azalpenak ematen, Arditurrin, artxiboko irudian. Udaberria iristearekin batera naturaren indarrak kolore biziagoa du. Zuhaitz eta landareetan, narrastietan, edo hegaztietan ikus daiteke hori. Horren jakitun, Oiartzungo Arditurrin (Gipuzkoako Parketxe Sarearen barruan dago) txorien doinuekin eta izaerarekin gozatzeko hainbat jarduera antolatu dituzte datozen asteetarako Udaberria txori artean hegan izenburupean. “Inguruan ditugun txorien kantuak ezagutzen al ditugu? Ba al dakigu zergatik egiten duten kantuan? Arrek eta emeek berdin egiten al dute kantuan?”. Galdera horiek, eta askoz gehiago erantzuten saiatuko dira, adituen eskutik. Naturarekin harreman zuzena izango dute jarduera horietan parte hartzen dutenek.
Hala, hilaren 13an txorien kantuak ezagutzeko saioa jasoko du parketxeak, Mikel Olano basozainaren gidaritzapean. 10:00etan hasiko da Arditurri ingurutik egingo den ibilbide erraza, txorien kantuen bila adi. “Txorien espezie ugari identifikatuko ditugu, Olanok bakoitzaren bizimoduari buruzko bitxikeriak azaltzen dizkigun bitartean”, zehaztu dute Arditurriko kideek. Aurrez, txorien munduko oinarrizko azalpenak eta haien kantuak identifikatzeko ariketa xumeak egingo dituzte partaideek. Mikel Olano, Euskal Herriko punta-puntako aditua da;. “Duen ezaguera-maila harrigarriari, komunikatzeko gaitasun aparta erantsi behar zaio. Ornitologian askotariko proiektuetan hartu du parte, besteak beste, pasa den urrian aurkeztu zen Euskadiko hegazti ugaltzaileen lehen atlas modernoa argitalpenean. Jardueran parte hartzeko 6 euro ordaindu behar dira (4 euro 12 urtetik beherakoek). Aurrez egin behar da erreserba.
Hilaren 27an, berriz, okilen berri izateko jarduera. Okilak, gure basoetako arotzak izenburupean Aitor Lekuona adituak okilen txori espezie horren gainekoak azalduko ditu. Jardueran parte hartzeko 6 euro ordaindu behar dira (4 euro 12 urtetik beherakoek). Aurrez egin behar da erreserba.
Maiatzaren 12rako, ostera, sai arreen teleskopio bidezko behaketa egiteko aukera zabaldu dute Arditurrin. 10:30ean hasiko da jarduera. Jardueran parte hartzeko 6 euro ordaindu behar dira (4 euro 12 urtetik beherakoek). Aurrez egin behar da erreserba.
Erreserbak egiteko edo informazio gehiago izateko, erabili honako bideak:
- Telefonoz: 943 49 42 48edo 688 89 50 68 zenbakietara deituz.
- Posta elektronikoz: egin klik hemen helbidera iristeko.
- Webgunearen bidez: egin klik hemen webgunera joateko.
