Maskaradaren azkeneko saiora bidaia antolatu dute, hilaren 27rako
Haurtzaro Ikastolaren eskutik, Pagolara joango dira. Aurtengo maskaraden berezitasun Nafarroa Behereko herritarrek estreinakoz antolatu dute.
Pagolako herritarrek lehenengo aldiz antolatu dute maskarada. Haurtzaro Ikastolak txangoa antolatu du Pagolara (Nafarroa Beherea), hilaren 27rako. Izan ere, bertan izango da maskaraden aurtengo denboraldiko azkeneko saioa.
Ikastolak gogorarazi duenez, lehenengo aldia izan da baxenafarrek Zuberoako maskarada antolatzen dutela. “Hizkuntza moldatu behar izan dute, dantzak ikasi… herriko gazte andana pastorala antolatzen!”.
Ez da lehenengo aldia izango Haurtzarokoak maskarada batera joango direla. Aurtengo planaren berri eman dute: 08:30ean aterako da autobusa Oiartzundik, ikastolako aparkalekutik, eta 20:00ak aldera iritsiko dira herrira.
Pagolan bazkalduko dute, eta oraindik zalantza dute ea maskarada antolatzen dutenen bazkarian izango den ala norberak etxetik eramanda.
Autobusean izena emateko azkeneko eguna hilaren 17a izango da —hurrengo asteazkena—, eta izena emateko galdetegi bat betetzea eskatu dute.
“Egun pasa bikaina izango dugu, guretzat hain ezagunak ez diren ohitura, festa egiteko manera eta kritika xorrotxak entzun, ikusi eta ikasteko”, animatu dute ikastolakoek.
