Zirta jatetxeko 'Baserri', aurtengo Gipuzkoako bakailao pintxorik onena
Atzo egin zuten Gipuzkoako Bakailao Pintxoen X. Lehiaketako sari banaketa Pasaian. Hondarribiko Tatapas gastrotekak hirugarren onena kozinatu du aurten.
Larraulgo (Gipuzkoa) Zirta jatetxeak irabazi du Gipuzkoako Bakailao Pintxoen X. Lehiaketa. Jatetxeko Iker Urangak kozinatutako Baserri pintxoa izan da aurtengo onena. Atzo iluntzean egin zuten sari banaketa Pasai Donibaneko Ziaboga jatetxea. Bertan, sukaldariekin batera izan ziren Teo Alberro alkatea eta Azahara Dominguez diputatua.
Aurtengo irabazleak pintxo irabazlearen gaineko xehetasunak eman zituen: “Baserrietan esnearekin egiten zen errezeta zahar baten berreskurapena da pintxoa, eta, kasu honetan, bakailao buruen talo zopa eginez egin dut interpretazioa”.
Juanba Berasategi aretoak jaso zuen final handia, astearteko arratsaldean (hilak 9) jokatu zuten. Bertan, 18 sukaldari zuzenean aritu ziren.
Atzoko sari banaketaren ondoren afari berezia egin zuten partaide eta antolatzaileek. Horrez gain, Felix Manso sukaldaria bakailaoaren enbaxadore izendatu zuten, “produktu horren aldeko inplikazio, dedikazio, laguntza eta apustuagatik”.
Bigarren saria Donostiako Okendo tabernak eskuratu du, Carlos Nuezen, Primavera pintxoarekin; hirugarren postua, berriz, Hondarribiko Tatapas gastrotekako Adur Arrietaren Sutondoan pintxoak eskuratu du.
