Gipuzkoako X. Bakailao Pintxo Txapelketaren final handia, Pasaian
Apirilaren 9an jokatuko dute finala, Juanba Berasategi aretoan. Zuzenean ariko dira sukaldariak, ateak zabalik izango dira herritarrentzat.
Garcia, Alberro eta Dominguez, gaurko aurkezpenean. Datorren astelehenean (hilak 25) abiatuko dute Gipuzkoako X. Bakailao Pintxo Txapelketa. Lurralde osoko 40tik gora tabernek parte hartuko dute aurtengo lehian eta aurtengo final handia Pasaian jokatuko da, Donibanen hain zuzen. Gaur aurkeztu dute aurtengo txapelketa Teo Alberro alkateak, Azahara Dominguez diputatuak eta Sonia Garcia Gilda eta Pintxo Kofradiako kide eta ekitaldiaren arduradunak.
Pasaiak jasoko duen finala showcooking formatuan egingo dute, hau da, zuzenean ariko dira kozinatzen, Donibaneko Juanba Berasategi kulturgunean. Apirilaren 9an (asteartea da) izango da final handia, 16:00etan hasiko da lehia. Ateak zabalik izango dira, interesdunek zuzenean jarrai dezaten.
Alberro alkatea izan da lehena hitza hartzen. Adierazi du bakailaoa “arrantza tradizioan erroturako herri baten ezaugarria” dela, eta “berezi” egiten duela horrek lehia hau: “Jakin badakit aurreko edizioetan maila oso altua egon dela lehiaketan, eta aurtengo parte hartzaileen zerrenda ikusita, gutxiagorekin ezin dugu espero. Etxekoen artean izen ezagunak ditugu”, esan du. Izan ere, Donibaneko Arkupe Berri eta Ziaboga, San Pedroko La Lonja taberna eta Trintxerpeko Busturia, Caserio eta La Bodeguilla eta Ulia tabernek parte hartuko dute lehian.
Dominguezek gaineratu duenez, horrelako egitasmoei esker “Gipuzkoa munduko eta erreferentziazko lehen mailako helmuga gastronomiko gisa mantendu daiteke”: “Denboralditik kanpo egiten den ekitaldi bat da, Gipuzkoan dagoen dagoen gastronomiarekin lotutako jarduera turistikoen agenda aberasten du”, esan du.
Garciak, bestalde, aurtengo txapelketaren gaineko xehetasunak eman ditu. Partaideen “kalitate gorena” nabarmen du, baita “horien aniztasun geografikoa”.
Bada, apirilaren 9ko finalean kozinatutako pintxoak baloratzeko, luxuzko epaimahaia izango du aurtengoak: Rest jatetxeko Felix Manso, Galerna jatetxeko Rebeca Barainca, Arzak-eko sukaldeburu Cynthia Yaber, Igor Cubillo kazetari gastronomikoa eta Alberto Santiago Santymar bakailao enpresako gerentea. Denen artean aukeratuko dute 2024ko onena.
Ekitaldian aurkeztuko dituzten pintxoak dastatzeko aukera izango dute bertaratutakoek, eta prezioak ezingo duela 4,50 euro baino gehiagokoa izan azaldu dute gaurkoan. Sari banaketa, ordea, apirilaren 10ean (asteazkena) izango da, Ziaboga tabernan egingo duten afarian.
