'Indarkeriaren oi(h)artzunak' estreinatuko dute bihar
Tamara Muruetagoienak lekukotza eman die Ander Iriarte eta Amaia Merinori. Donostiako Giza Eskubideen zinemaldian izango da estreinaldia.
Tamara Muruetagoiena, 'Indarkeriaren oi(h)artzunak'-en trailerretik hartutako fotograman. Esteban Muruetagoienaren kasua du ardatz Indarkeriaren oi(h)artzunak dokumentala, bere alaba Tamararen hitzen bidez. Ander Iriarte eta Amaia Merino zuzendariek osatu dute dokumentala. Bihar estreinatuko da, Donostiako Giza Eskubideen Zinemaldiaren 21. ekitaldian.
Proiekzioa Donostiako Viktoria Eugenia antzokian izango da, 19:00etan hasita. Sarrerak salgai daude Donostia Kulturaren webgunean.
Lau hamarkada justizia bila
42 urte dira Esteban Muruetagoiena Oiartzungo medikua hil zenetik. 1982ko martxoan Guardia Zibilak atxilotu eta haien eskuetan hamar egunez inkomunikatuta egon zen, eta askatzean tortura arrasto nabarmenak zituen. Orientazioa galduta zegoela esan zuten ikusi zutenek, eta hiru egunera hil zen.
Alaba Tamarak ibilbide luzea egin du aita biktima gisa izendatzeko, eta hori azaltzen da filmean, honakoekin: Familiaren tragedia kontatu du kameraren aurrean: ETAk iraultza zerga eskatu ziola, eta bere familia bahitu zuela hamazazpi egunez; ondorengo familiaren desegituratzea; estatuaren jazarpena; epaiketa; gurasoen atxiloketak; tortura…
Muruetagoienak bere lekukotasuna eman zuen 2022ko martxoan, Oiartzunen, Jonathan Martinezekin.
Muruetagoienak egia jakiteko eta aitortza jasotzeko egindako lana islatu dute Merino eta Iriartek, Adur Larrearen narrazioarekin. Elkarrizketa gatazkak konpontzeko tresna gisa aldarrikatzen du Muruetagoienak dokumentalean.
Oiartzungo Udalaren babesa
Duela bi urte —2022an— Oiartzungo Udalak indarkeria politikoaren biktima gisa aitortu zuen Esteban Muruetagoiena, EH Bildu eta EAJren aldeko botoekin.
Aitortza instituzionala egiteaz gain, Oiartzungo herriari zuzenduriko ekitaldi zikloa ere antolatu zuten oraindik aitortu gabeko biktimak ikusarazi eta torturaren errealitateari ahotsa emateko.
Gainera, Indarkeriaren oi(h)artzunak dokumentala babestu eta sortu ahal izateko ekarpen ekonomikoa egitea ere erabaki zuen bi talde politikoetako ordezkariek osatzen duten Bizikidetza Mahaiak. Dokumentala laster Oiartzunen ere ikusteko aukera izango dela aurreratu du Oiartzungo Udalak.
