Oiarperen asteburuko partiden kartelera (2024-04-12)
Oiartzungo klubeko pilotariek 33 partida jokatuko dituzte asteburuan. Horietatik 11 Madalensoron izango dira, eta hiru kanporaketa.
Oiarperen 20. urteurreneko jaialdiko irudia. Oiarpe pilota elkartekoentzako kartelera oparoa izango da asteburu honetakoa: 33 norgehiagoka jokatuko dituzte jardunaldian. Horietako bost atzo jokatu zituzten (Hitzak, ohi bezala, astelehenean jakinaraziko ditu emaitzak).
Gaurko partidei dagokienez, bost Madalensoron izango dira. Etxean jokatuko duten partida-sorta 18:00etan hasiko da. Bihar beste dozena erdi partida jokatuko dute etxean bertan. Pixka bat goizago hasiko dira, 17:00etan.
Partida gehien-gehienak txapelketetako lehenengo fasetakoak izango dira. Hala ere, hiru salbuespen izango dira. Igandean, Iruritan, Baztango Udaberri Txapelketako bi finalerdi jokatuko dituzte. Gaztetxoen B Mailan, Etxeparek eta Caetanok Zubiria eta Gorraitz izango dituzte aurre aurre.
A Mailan, Etxeberria oiartzuarrak eta Oses hernaniarrak osatutako bikoteak Oberenako Oltza eta Ilunpeko Oltza izango dituzte arerio.
Asteartean, Bergaran, Leonet oiartzuarrak Apezetxea goizuetarrarekin batera bilatuko du Bergara Hiria Txapelketako finalerdietan sartzea, Etorkizuneko Pilotarien mailan.
