Sanmarkosene egoitzako langileek mobilizazioei ekin diete
Astelehen, asteazken eta ostiraleko egoitzaren aurrean mobilizazioak egiten hasi dira langileak, langile falta salatzeko.
Sanmarkosene egoitzako langileek mobilizazioak hasi dituzte astelehen, asteazken eta ostiralero egoitzaren aurrean, eta elkarretaratzearen inguruan eta bertako egoiliarrek duten egoeraren inguruan azalpenak ematen dituen prentsa oharra argitaratu du ELAk. Bertan adierazi dutenez, egoitza hau Gureak enpesak kudeatzen du, eta 130 plaza ditu, gehienak Gipuzkoako Foru aldundiarekin kontzertatutakoak, eta bertan 150 langilek egiten dute lan; gehienak, emakumeak.
Gehitu dute, ELAk urteak daramatzala Gipuzkoako erresidentzietan dauden langile falta eta ratio baxuak salatzen eta borrokatzen, eta hori dela diote Sanmarkosenen langileak kalera atera aratzi dituen arrazoi nagusietakoa.
Ildo horretatik, egoitzan langileen ez ordezkatzeak behin eta berriz ematen direla salatu dute; eguneroko arazoa dela diote, eta horrek langileen gehiegizko lan kargak eta zerbitzuaren okertze nabarmena dakarrela azpimarratu dute. Egun batzuetan egoiliarrak kartoizko plateretatik eta plastikozko edalontzietatik ari direla jaten diote, eta gaueko txandakoak oso berandu oheratzen dituztela ere salatu dute. Gainera, esan dute goizean jaikitzen dituztenetik (7:30-8:00) 22:00ak arte, zenbait kasutan, erabiltzaile batzuek gurpil aulkietan eserita igarotzen dituztela ordu guzti horiek.
ELAk enpresari langileak berehala ordezkatzen hasteko eskatu dio, eta Aldundiari ratioak igo eta zaintza sistema publifikatzeko eskaria luzatu nahi izan dio “ez baita bateragarria langileen lan baldintza duinak eta egoiliarrek merezi duten kalitatezko zerbitzuak, irabaziak eskuratzeko helburua duten enpresekin”.
