[Erreportajea] Uda baketsu eta zoriontsurik gabe gera ez daitezen
Ahalik eta harrera familia gehien behar ditu Oporrak Bakean programak. Uda honetan 300 haur saharar jaso nahi dituzte, eta hori lortzetik «oso urrun» daudela azaldu du Bixi Bixi elkarteak.
Uztailean heltzen dira haur sahararrak gurera, eta bi hilabeteko egonaldia egiten dute. Argazkia: Bixi Bixi Azken urteotan Saharatik heldutako zientoka haurrek uda zoriontsu eta baketsu bat pasatu dute Euskal Herrian. Oarsoaldean eta Bidasoan ere gerratik eta basamortuko berotik ihes egiten duten askori egin diete harrera, familia askok egin baitute bat Oporrak Bakean programarekin. Azken urte hauetan, ordea, beherakada handia sumatu dute, eta aurtengoa ere konplikatua izango dela aurreikusi dute. Izan ere, ez dituzte nahikoa familia jaso nahi dituzten 300 haur sahararrentzako.
Donibaneko Bixi Bixi elkarteko Ixiar Goienetxea oso kezkati da azken urteetan izandako joerarekin: «Garai batean Espainiako Estatu osoan 12.000-14.000 haurri egiten zieten harrera, eta azken urteetan 4.000 izan dira. Horrek esan nahi du izugarrizko jaitsiera izan dela, eta Euskal Herria ez da salbu. Familia askoz ere gutxiago daude gurean ere, baina hona etortzeko beharra duten haurren kopuruak berdina izaten jarraitzen du», esan du.
Araba, Bizkai eta Gipuzkoako harrera familien artean ez direla «inondik inora ere» aipatutako 300eko langa horretara iritsiko erantsi du, amorruz. «Oso urrun gabiltza gure helburuetatik. Haur asko etorri gabe geratuko dira eta horrek desfase bat sor dezake egitasmoan».
Izan ere, laguntza «inoiz baino beharrezkoagoa» dutela aipatu du, kezkati, Goienetxeak. «Kanpamenduen egoera oso-oso gogorra da, atzeraka egiten ari da izugarri. Nazioarteko egoera ere oso konplikatua da, eta laguntza murriztu egin da ikaragarri. Gurea sokorru dei bat da, gure laguntza behar dutelako».
Harrera familia izateko ez dela inbertsio handirik egin behar gogorarazi du: «Bidaia eta gainerako gastuak elkarteak eta programak hartzen ditu bere gain. Familia batek zein kostu dauka? Familiarena bera, eta janari pixka bat gehiago, besterik ez», dio. Horregatik, harrera familia izateak merezi duela dio, zalantzarik gabe: «Iturri bat ireki edo igerileku edo itsasoa ikusten dutenean jartzen duten aurpegi hori ikustearekin bakarrik merezi du. Eta badirudi guk ematen diegula dena, eta ez da hala. Guk ematen dieguna baino gehiago jasotzen dugu».
Harrera familia izan nahi dutenek 696 01 47 86 telefono zenbakira hots egin dezakete.
