Haur eskola publikoetarako matrikulazioa apirilaren 22an irekiko da
Hilaren 22tik maiatzaren 10era izango da matrikulazioa, eta presentzialki zein telematikoki egiteko aukera eskaini dute Uztargi eta Goialdek.
Nere Zaragozano, Itsaso Cruz eta Maider Sanchez. Uztargi eta Goialde haur eskola publikoetan 2024-2025 ikasturterako matrikulazio epea apirilaren 22tik maiatzaren 10era egongo dela zabalik adierazi dute Itsaso Cruz Hezkuntzako Zinegotziak, Maider Sanchez Goialde haur eskolako koordinatzaileak eta Nere Zaragozano Uztargi haur eskolako koordinatzaileak gaur goizean egindako agerraldian.
Izen ematea aipatutako egunen artean egin behar bada ere, familiek instalazioak eta bertako hezitzaile zein gainontzeko langileak ezagutzeko aukera emango dieten ate irekien jardunaldiak egingo dituzte. Uztargin, hilaren 16an izango da, 16:00etatik 17:30etara. Goialden, berriz, bezperan, hilaren 15ean, 16:00etatik 17:30etara. Bi kasuetan, aurretiazko hitzordua eskatu beharko da, telefonoz. Uztargiren telefonoa 943 51 22 16 da, eta Goialderena 943 52 07 62.
Horretaz gain, izen ematearen inguruko datuak ere eman dituzte. Bi modu daudela horretarako zehaztu dute: telematikoa bata, eta presentziala bestea. Modu telematiko bidez egin nahi ezkero, haur eskolen webgunea erabili behar da. Hots, modu presentzialean egin nahi bada, apirilaren 22tik maiatzaren 10era artean egin beharko da, eta ez da aurretiko hitzordurik hartu beharko. Hala ere, haur eskolen ordutegiak zein diren zehaztu dute. Uztargira astegunetan 11:00etatik 14:00etara eta arratsaldez (astearte eta ostegunetan) 15:00etatik 17:00etara gerturatu daitezke familiak. Goialdera, berriz, astegunetan 8:00etatik 16:00etara bitartean, baina 12:000etatik 13:00etara bertaratzea hobesten dute.
Euskara lehenetsiz
Errenteriako Udalak gogorarazi nahi du herrian hezkuntza eskaintza zabala dagoela 0-2 adin tartean ere. Era berean, gehitu dute aniztasun horrek ekosistema aberatsa eskaintzen duela hezkuntzaren eremuan, familiaren eta haurraren beharretara ondoen egokituko den eskaintza hautatzeko aukera eskainiz.
Horretaz gain, Errenteriako Udalak hautu hori herriko haur eskoletan egitera eta D eredua lehenestera gonbidatu nahi ditu familiak, eta balorean jarri nahi du haur eskolek jendartean betetzen duten funtzio hezitzaile eta soziala, zaintza garapen pertsonal eta sozialaren erdigunean jarriz.
Eusko Jaurlaritzak ezarritako ratioen arabera, 0-1 urteko gelan zortzi haur dituzte gehienez, eta 1-2 urtekoen gelan, berriz, hamahiru. Bi haur eskoletan bina hezitzaile daude etengabe haurrekin, eta hezitzaile horiek dira haurrei jaten eman eta haurrak lotaratzen dituztenak.
Goialde haur eskolan bi gela daude, eta etxeko giroa eta familiartekoa bermatzen dela azpimarratu dute. Gainera, gehitu dute aparkatzeko arazorik ez dagoela, eta hezitzaileek etengabeko formakuntza jasotzen dutela. Uztargi haur eskolak, berriz, bost gela handi eta belarguneak ditu. Sukaldaria dute bertan haurren eguneroko bazkaria prestatzeko, eta janari ekologikoa eskaintzen dute.
Bi haur eskolek ordutegi bera dute: 08:00etatik 16:00etara.
