Elektrotxuflak dantzan jarriko ditu antxotarrak larunbatean
10. urteurrenari lotutako ospakizunei bukaera emango diete larunbatean, egun osoko festarekin. "Gogoratzeko eguna" izango dela aurreratu dute, "zoragarria, itzela, kitzikagarria".
Elektrotxufla elektrotxarangako kideak. Elektrotxufla elektrotxarangak 10 urte bete ditu jada. Urteurren biribila behar bezala ospatzeko bira berezia egin dute azken asteotan, eta horri bukaera emango diote Pasai Antxon larunbat honetan (hilak 20). “Gogoratzeko eguna” izango dela aurreratu du txarangak sare sozialen bidez, “zoragarria, itzela, kitzikagarria”.
Egun osoko egitaraua prestatu dute larunbaterako. Protagonistek emango diote hasiera egunari, 12:00etan barrutiko kale eta plazetan eskainiko duten emanaldi ibiltariarekin. 15;00etan, bazkari herrikoia egingo dute Ibaiondon. Sabelak ongi bete ondoren, 16:30ean, Andoni Ollokiegik kontzertua eskainiko du pilotalekuan. 18:00etan, berriz, barrutiko kaleetan barrena ibiliko dira berriro antxotarrak, Malatxo txarangarekin. 22:30ean, Ibaiondon berriz, Sakatu elektrotxarangaren txanda helduko da. 00:00etan Kolpez Blaik alaituko du pilotalekua eta eguna biribiltzeko, 00:30etik aurrera, DJ Txorimalo ariko da.
