Euskal kantutegian oinarritutako antzezlana, igandean
'Ez Dok Hiru! Akustikoa' taularatuko du Tartean taldeak igandean, euskal musikaren "benetako istorioa" umorez kontatzeko.
Mikel Martinez eta Patxo Telleria aktoreak [Arg.: Guillermo Casas]. Oiartzungo Antzerkizaleen Elkartearen ikasturteko egitarauaren hurrengo zita datorren igandean —hilak 21— izango da. Ohi bezala, Landetxen izango da antzezlana, 19:00etan hasita. Sarrerak salgai daude udalaren sarreren webgunean, 8 euroren truke.
Tartean Teatroaren Ez Dok Hiru! Akustikoa lana ikusteko aukera izango da, Ez Dok Hiru! antzezlanaren bertsioa. Euskal musikaren “benetako istorioa” kontatuko dute Patxo Telleria —berak sortu du antzezlana— eta Mikel Martinez aktoreek, Adrian Garzia de los Ojos musikariarekin batera.
Publiko helduari zuzendutako antzezlana da, umorez josia. “Euskal Herriko imajinario musikalaren errepaso ironiko, absurdo eta dibertigarria da”, jakinarazi du Tartean-ek.
Musikaren orkestrazio “xumeagoa” badu ere, zuzeneko musikaren indarra gordeko duela ziurtatu dute. Baita ere ikuskizun originalaren “balorerik preziatuena” gorde ere: “Umorea eta euskal musikari egiten zaion omenaldia bero eta hunkigarria”.
Sinopsia
Zenbat euskal kanta ezagutzen dituzu, zahar edo berri? Kalkulua egin duzu inoiz? Ziur gaude uste duzuna baino askoz gehiago direla. Patxo Telleriak bere estilo paregabea erakusten du, Mikel Martinezekin batera ari den ikuskizunean testuak sortzeko, musikari-antzezle batek (Adrian Garcia de los Ojos) lagunduta.
Orain bertsio akustikoan, baina zuzenekoaren indar berberarekin, aurkeztuko den Ez dok hiru lanak Euskal Herriko musikaren imajinarioaren kritika ironikoa, absurdoa eta dibertigarria ematen digu. Ikuskizunaren balio preziatuenak umorea eta euskal musikari egiten zaion omenaldi beroa eta hunkigarria dira.
