Herriko ikasleek Pasaiako Udaleko Zerbitzuen pabiloia bisitatu dute
Hiru ikastetxeetako LH 5eko ikasleek bertatik bertara ezagutu dute langileen egunerokoa. Bisitak "didaktikoak eta emankorrak" izan direla dio udalak.
Pasaiako hiru ikastetxeetako LH 5eko ikasleak Pasaiako Udaleko Zerbitzuetako Sailaren Donibaneko pabiloian izan berri dira, bertatik bertara ezagutu dezaten langileen egunerokoa. Urteroko bisita hau “didaktikoa eta emankorra” izan dela adierazi du Aintzane Taberna alkateordeak.
Ikasle kopurua handia denez, bi txandatan egin dituzte bisitak. Lehenik, Anuntziata eta Karmengo Amako ikasleak izan dira; haien ondoren, Pasaia-Lezo Lizeoko ikasleak izan dira.
Tabernaren arabera, “Haur eta Nerabeen Sailak gazteen parte hartzea sustatzeko martxan duen Eskubideen programaren barruan hasi zen udala bisita hauek antolatzen, eta hain arrakastatsuak izan zirenez, urtero-urtero egitea erabaki zen”. Iraitz Pazos Zerbitzuetako zinegotzi “gazteak kontzientziatzeko” beharraz aritu da. Jardunaldi hauen helburua “pedagogikoa” ere badela esan du: “Haurrak kontzientziatu nahi ditugu hondakinen eta garbiketaren inguruan”. Bide batez, departamentuko langileen lana goraipatu du Pazosek: “Aitortza egin nahiko nieke egunerokoan gure kaleak txukun, garbi eta bizigarri mantentzeko lanean dihardutenei, ezinbestekoak baitira pasaitarron egunerokoan”.
