'Negu hurbilak' filma proiektatuko dute ostegunean
Negu kolektiboaren euskarazko filma ikusi ahal izango da. Euskal gatazkak ihesera bultzatutako neska baten istorioa kontatzen du.
'Negu hurbilak'-en fotograma. Datorren ostegunean, hilak 18, Landetxe eraikineko auditorioa zinema-areto bilakatuko da berriro. Izan ere, Negu hurbilak filma proiektatuko dute bertan. 19:30ean hasiko da saioa, eta sarrerak salgai daude udalaren sarreren webgunean, 3 euroren truke.
Negu kolektiboak sortu eta zuzendu du filma. Ekain Albitek, Mikel Ibargurenek, Nicolau Mallofrek eta Adria Rocak osatzen dute kolektibo hori. Aktoreen artean, Jone Laspiur da profesional bakarra, eta gainontzekoak Zubietako (Nafarroa) herritarrak dira.
Kataluniako ESCACen (Kataluniako Zinemagintza eta Ikus-entzunezko Arteen Eskola) zinemagintza ikasten ari zirela ezagutu zuten elkar lau zuzendariek, eta beraien lana Locarnoko (Suitza) zinemaldian saritu zuten.
Sinopsia
Euskal Herriak bizi izan duen gatazka luzea amaitzear dago 2011n. Neska gazte bat ihesi doa. Helburu garbi bat dauka: muga pasatzea, bai baitaki, hala, bere jaioterritik, bere jaiotetxetik urrun eramango duela, bertan ez baitago seguru. Ihesean doala, Zubietara iritsiko da. Mugako herri horretan, antzinako mitoek eta gaur egungo gatazkak bat egiten dutela ematen du. Herriko etxe bateko ganbaran ezkutatuta, harria bezain mugigaitza den hango egunerokotasunaz jabetzen hasiko da.
Denbora lauso eta mugagabea igaro ahala, egunak gau eta gauak egun bihurtzen diren horretan, protagonistaren ihesa gero eta trakets eta korapilatuagoa bihurtuko da, eta behe-laino trinkoak erabat inguratuko du.
