Bizardiaren mendi-ibilaldiaren tradizioa hilaren 28an berrituko dute
Elkarteak antolatzen duen mendi-ibilaldiaren XLIII. ekitaldia izango da. Aurtengo berritasuna izango da Gurutzetik aterako direla.
Iazko Bizardiaren mendi bueltaren irudia. Gurutzeko Bizardia Elkarteak 43. aldiz egingo du urteroko mendi ibilaldia. Aurtengoaren data aukeratu dute: apirileko azkeneko igandea izango da. Hilaren 28an zita dute, beraz, mendi-bueltak egitea maite dutenek.
Aurtengo berritasunik handiena abiapuntua izango da: elkartea dagoen auzotik bertatik aterako da. Gurutzeko frontoian jarri dute zita, 07:30ean. Antolakuntzako kideek uste dute parte-hartzaileak erosoago egongo direla modu horretan.
Hori bai, eskaera egin dute autoz igoko direnei: kotxea partekatzea. Izan ere, auzoan ibilgailua uzteko toki gutxi dago.
Ibilbidea
Hileko azkeneko igandeko igandeko mendi-bueltak 21 kilometro eta erdi inguru izango ditu. Lehenengoak 07:30ean aterako dira, eta haien atzetik, minutuero, gainontzeko talde edo norbanakoak.
Ibilbidearen berri eman dute. “Gurutzeko pilotalekutik Telleri Berri baserrian aurrean dagoen bidea hartuko dute partaideek Ameztoieta baserriraino. Jarraian, Gorrinzulo Berri baserria eta Leungo Arkaitzak atzean utzita Elurretxera”, jakinarazi dute antolatzaileek.
Ibilaldiaren “mamia” hor hasiko dela adierazi dute. Toki “nahiko ezezaguna, baina polita” dela ziurtatu dute, eta 7 kilometroko osteratxoa egiteko aukera izango dute.
“Elurretxetik gertu berriro bueltan, Pikogarate Zaharrera joango gara, eta ondoan dagoen bide batetik bera Malkorra izena duen leku bateraino. Hemen bide nahiko laua eta argazkietarako leku ederrez betea elkartera, non hamaiketakoa zain izango den”.
Jakinarazi dutenez, “arazo baten ondorioz”, aurten ez dute diru-laguntzarik jaso. Zazpi eurokoa izango da ordaindu beharreko kuota, eta 14 urtetik beherakoek doan izango dute.
Goiz “zoragarria” pasatzeko gonbita egin dute, eta familia, lagun-talde edo menditik ibiltzea gustuko duen orori dei egin diete hara hurbiltzera. Ondoren, hamaiketarakoarekin, sari goxoa izango dute.
Iazko ekitaldian 230 lagunek hartu zuten parte.
