Etxera Egunean 141 itzuli emateko erronka jarri dute, maiatzaren 5ean
Oiartzungo Sarek euskal preso bakoitzeko zirkuitu bati buelta emateko erronka bota du. Izen-ematea doakoa da, eta bazkaria ere antolatu dute.
Oiartzungo Sarek gatazkaren konponbidean pausoak ematen jarraitzen du. Zita bat jarri dute: maiatzaren 5a. Orduan egingo dute Etxera Eguna. Euskal presoak etxeratzeko bidean “oztopo” den “salbuespen” legediarekin gainditzea da beraien helburua, eta hori aldarrikatuko dute maiatzeko lehen igandean.
“Benetako konponbidea, oztopo horiek gainditzeko giltzak ditugula irudikatuko dugu; oztopoak gaindituz, itxitako sarrailak irekiz, batera, oinez, pixkanaka…”, zehaztu du Oiartzungo Sarek.
141 itzuli
141 dira egun dauden euskal presoak, eta beste hainbeste itzuli eman dizkiote Etxera Egunerako propio prestatutako zirkuitu labur bati. Asmoa erronka oinez —norbera bere erritmoan— egitea dela jakinarazi dute, eta ez dela lasterketa bat.
Done Eztebe plazan hasi eta bukatuko da ibilbidea, eta honako tokietatik pasatuko da: Irubide taberna, Haurtzaro Ikastolako aparkalekua, hilerria, Txara, bidegorriko Altzibarko komunak, kiroldegia, eta buelta. 2 eta 5 pertsona arteko taldeak aterako dira, minutuero, bi norabideetan.
Guztira, 3,7 kilometroko ibilaldi aldarrikatzailea izango da.
Izen-ematea
Parte hartu nahi dutenei izena emateko eskatu diete, antolakuntza-lanak errazte aldera. Garmendi txokolategian edo Miren tabernan eman daiteke izena, baita e-posta bidez edo Instagrameko kontura mezua bidaliz.
Lehenengoak 11:00etan irtengo dira, eta talde bakoitzak noiz atera beharko duen aurretik jakinarazi zaio. Esleitutako irteera-momentua baino ordu laurden lehenago ateratzea eskatu du Sarek.
Ekitaldi gehiago
141 itzuliak emateari 13:30 inguruan bukatuko dutela aurreikusi dute. Bukatzeko ekitalditxoa egingo dute, eta 14:30ean hasiko da bazkaria, plazan bertan.
Bazkarira joan nahi duenak Mirenen eta Garmendin ditu eskuragarri, 8 (haurrak) eta 12 euroren (helduak) truke. Bazkaltzeko bi paella mota egongo dira, horietako bat barazkiduna.
Eguna giro onean pasatu nahi dute, eta bazkaldu ondoren, Andoni Oilokiegik are gehiago girotuko du. 16:30ean inguruan hasiko da bere emanaldia.
