Oiartzungo argazki zaharren erakusketa bisita daiteke
Landetxen ikus daitezke argazkiak, hilaren 30era arte. Zahar eta gazteen arteko elkarlanetik sortu da erakusketa. Ostegunean, saio gidatua.
Oiartzungo argazki zaharrak ikusteko aukera izango da gaur hasi eta hilaren 30era arte (hurrengo asteartea). Belaunaldien arteko erakusketa izango da, Zaintzadik eta Oiartzungo Topaguneak antolatutakoa.
Martxoan hasi ziren herriko txokoetako argazki zaharrak biltzen, eta jada ikusgai daude. Landetxeko egongelan (0 solairuan). Herriak izan duen aldaketaren testigu dira argazkiak. Herriko auzoetakoak eta Arditurrikoak jarri dituzte.
Erakusketa sortzeko prozesua parte-hartzailea izan da eta adinekoak osatutako talde motor bat ibili da lan guztiak koordinatzen. Datorren ostegunean, hilak 25, saio berezia egingo dute, adinduen eskutik.
19:00etan hasiko da. Adineko pertsonek, haien bizipenetatik eta esperientzietatik abiatuta, argazkien atzean dauden istorioak, bitxikeriak eta bizipenak kontatuko dizkiete hurbiltzen direnei. Herri guztiari irekia izango da, eta ez da aurretik sarrerarik eskuratu beharko.
