2024ko Kirol Sarirako hautagaiak aukera daitezke
Maiatzaren 10era arte online edo Elorsoron egin ahal izango dira proposamenak. Bederatzigarren ekitaldia da aurtengoa.
Urrian ospatuko dute, beste behin, Oiartzungo Kirol Astea. Jarduera fisikoa sustatzeko hasi ziren antolatzen duela zortzi urte, eta Kirol Saria izan ohi da plater nagusietako bat.
Bederatzigarren sarirako hautagaiak proposa daitezkeela jakinarazi du Oiartzungo Udalak, bihar —asteazkena— hasi eta maiatzaren 10era arte. Elorsoro kiroldegira jo daiteke, edo online jarri duten galdetegia beteta.
Proposamenen artean aurtengo Kirol Saria jasoko duena nor izango den erabakiko du Oiartzungo Udalak eta herriko kirol elkarteek osatzen duten Kirol Aholku Kontseiluak (UKABEk).
Orain arteko irabazleak honakoak dira:
- 2016: Girizia elkarteko kirol saila.
- 2017: Periko Sanroma Haurtzaro Atletismo taldeko sortzailea.
- 2018: Xanistebanetako sokatira txapelketa herrikoia antolatzen duen Artaso Elkartea.
- 2019: Ane Asensio atleta.
- 2020: Alain Isasa kenshia.
- 2021: Guruzne Azpiroz arraunlari ohia.
- 2022: Koldo Fernandez Oiartzun Kirol Elkarteko lehendakaria.
- 2023: Alex Bargallo judoka.
