Yakovlev 42ren 'Adierazpen askatasuna', bihartik aurrera plataformetan eskuragarri
Maiatzaren 4an aurkezpen kontzertua emango dute, Errenteria-Oreretako Niessenen. Bi egunera, epaitegira joan beharko dira.
Yakovlev 42, duela urte pare bateko kontzertuan [instagram.com/yakovlev42_streetpunk/]. Yakovlev 42 streetpunk taldeak bere seigarren argitaratuko du bihar, hilak 24. Eguerditik aurrera 40 plataformaren (Youtube eta Spotify daude tartean) bitartez eskuratu ahal izango da Adierazpen askatasuna izeneko diskoa.
Beraien itzuliaren lehenengo geltokia Errenteria-Oreretan izango da, Niessen aretoan. Maiatzaren 4an (larunbatarekin) aurkeztuko dute disko berria, eta Zirt-Zart eta Etsaiakeroak taldeekin partekatuko dute oholtza. Oarsomusikak antolatu du kontzertua.
Sarrerak salgai daude, 12 euroan, Errenteriako Udalaren sarreren webgunean. Sarrerarekin diskoaren ale bat oparituko dutela aurreratu dute. 19:50ean hasiko da emanaldia.
Astelehenean, epaitegira
Aurkezpen-kontzertutik bi egunera, Donostiako Instrukzio Epaitegira joan beharko dute Yakovlev 42ko kideak, ikertu gisa. Egun taldeko kide diren eta izan diren sei lagunek epaitegitik pasatu beharko dute maiatzaren 6an. Otsailean bi kidek jaso zuten zitazioaren jakinarazpena, eta egun batzuetara, gainontzeko laurek.
Guardia Zibilaren txosten batek abiarazi du prozesua. Taldeko kideak ikertuta daude —Guardia Zibilaren arabera— abestien letra “guztiz intoleranteengatik”, kontzertuetan zenbait jokabide erakusteagatik eta indarkeria “etengabe goraipatzeagatik”.
Yakovlev 42 taldeak azaldu zuenez, zitazioek Adierazpen askatasuna diskoaren grabaketa betean harrapatu zituzten. Duda-mudatan ibili ondoren, aurrera egitea erabaki zuten, beraien seigarren kaleratzeko.
Honakoak izan dira orain argitaratutako lanak, 2016tik 2020ra, kronologikoki: Streetpunk antifa; Lapesadilla continúa; Secuestro express; Antolatu, borrokatu, egin; eta Vuestro pecado.
