Lezon ere euskararen alde harrotuko dira
Euskal Herrian Euskarazen Harrotze Astearen harira, hainbat ekitaldi jasoko ditu herriak. Lehenak ostegunean egingo dituzte.
Euskal Herrian Euskaraz herri mugimenduak deitutako Euskaldunon Harrotze Astearekin bat egin du Piztu Lezok. Euskal Herri euskalduna aldarrikatzeaz gain, euskararen aldeko borrokak kalean ikustaraztea eta indartzea izango du xedetzat hilaren 22tik 28ra arteko aldarrikapen aroak, nahiz eta horien aurreko eta hurrengo egunetan ere izanen diren ekintzak. Herriz herri hainbat jarduera antolatzen ari dira astearen harira. Lezon ere badaude ekitaldiak. Lezo Euskaragarri prozesuaren barruan daude, aldi berean, herrian antolatutakoak.
Lehenak hilaren 25ean (ostegunean) izango dira. Piztu Lezok Harrotasunaren kalejira deitu du, 20:30eran, Gurutze Santuaren plazatik hasita. Kaleetan euskararen aldarria egin ondoren, mokadutxoa jateko bilduko dira Txerrimuñon 21:15ak inguruan.
Bigarren ekitaldia hilaren 30erako prestatu dute. Kultura Aretoan, 19:00etan hasita, Zeresan dokumentala emango dute, eta ondoren, Lezoko gazteak eta euskara solasaldiari eutsiko diote Jaime Altuna gizarte antropologo eta Euskararen funanbulistak tesiaren egileak, eta Aitor Salaberria Piztu Lezoko kideak.
