Oarsolan, enpleguan eta inklusioan lanean jarraitzeko
Oarsoaldeko enplegu zerbitzuak Oarsolan izena izango du aurrerantzean, eta egoitza Lartzabal auzora lekualdatu dute.
Oarsoaldeko Enplegu Zerbitzuak aro berria hasi du. Orain, Oarsoaldea Garapen Agentziaren barruko baliabideak izen eta egoitza berria ditu. Izena: Oarsolan, Oarsoaldeko Enplegurako eta Inklusiorako Berrikuntza Zentroa. Kokapen berria: Errenteria-Oreretako Olibet auzotik, Lartzabal auzoko 31. zenbakira (irudian ageri da egoitza berriaren aurrealdea). “Trantsizio hau mugarri bat da agentziak komunitateari zerbitzu hobea emateko duen misioan, ikuspegi berrituarekin berrikuntzan, eta laneratzean”, adierazi dute garapen agentziatik. 1993tik zuen enplegu zerbitzua Oarsoaldeak Olibeten; astelehenean hasi da Lartzabalgo bulegoa martxan. Ekainaren 13an egingo dute inaugurazio ofiziala.
Zerbitzuaren erabilerarako hainbat argibide eman dituzte Oarsolanetik. Hala, astelehenetik ostiralera 08:00etatik 14:30era izango dela zabalik adierazi dute, baina hara zuzenean joan baino, aurrez txanda eskatzea aholkatu dute. Hori egiteko, edo zalantzak argitzeko, 943 51 02 00 telefono zenbakira dei dezakete interesdunek, baita haien posta elektronikora idatzi ere.
Aro aldaketarekin, Oarsoaldea Garapen Agentziak eskualdean aurrerapenerako eta aukeretarako motorra izaten jarraitzeko konpromisoa berretsi du, “enplegua bilatzen ari diren pertsona guztiei eta lan-arrakastarako bidean dauden enpresei laguntzen jarraitzeko esperantzan”.