Eskalerillaseko bizilagunen aldeko manifestazioa egingo dute ekainaren 1ean
Kale gorrian geratzeko arriskuan diren bizilagunentzat alternatiba bat exijitzeko mobilizatzera deitu du Oarsoaldeko Etxebizitza Sindikatuak. Kalitatezko etxebizitza doakoa eta unibertsala aldarrikatuko dute.
Joan den larunbateko Elkartasun Eguneko mobilizazioan ateratako irudia da. Oarsoaldeko Etxebizitza Sindikatuak manifestazioa antolatu du datorren ekainaren 1erako (larunbata da). Honetan, beste behin ere, Pasaiako portuak Eskalerillaseko 12 bizilagun kale gorrian utzi nahi dituela salatuko dute. Gaur gaurkoz ez portuak ez udaletxeak ez diela “inolako aterabiderik eskaini” salatzera aterako dira kalera. Trintxerpeko Gudarien plazatik abiatuko da mobilizazioa (12:00etan), eta honetan parte hartzera deitu dituzte herritarrak sindikatuko kideek eta bizilagunek.
Manifestazioa iragartzeko bidali duten oharrean, lehenik eta behin, “duela 60 bat urtetik familien bizileku den blokea bota” nahi dutela gogorarazi dute sindikatuko kideek, bertan Euskal Trenbide Sareak eta Pasaiako Portuak merkantzien trenbide bat eraiki dezaten. Ondorioz, bertan bizi diren 12 familiek kaleratzeko agindua jaso dute, bizilagunei “inolako bizitoki aterabiderik” eskaini gabe.
“Milioika euroko aurrekontua duen obra honek orain arte dirua pilatu dutenek dirua pilatzen jarrai dezaten balioko du, eta horretarako 12 familia bizileku gabe geratuko direlarik. Gainera, eskualdeko etxebizitzaren egoera zein prezioa kontuan izanda, Pasaiako portuaren “alternatiba” hutsaren hurrengoa dira: titularren kasuan, etxebizitza bat bermatzeko nahikoa ez den diru kopuru bat, eta titular ez direnen kasuan, beste administrazio publikoekin mediazioa besterik ez. Hau da, ezer ere ez. Portuko agintaritzak sekretupean eraman du desalojo asmoa, eta orain dela aste batzuk jakinarazi du 4 hilabete dituztela etxea uzteko”, adierazi dute, amorruz.
Egoera horren aurrean , eta “instituzioen fartsaren” zein “etxebizitza merkantzia gisa ulertzen duten enpresari eta politikarien aurrean”, kalitatezko etxebizitza doakoa eta unibertsala aldarrikatu dute, baita etxegabetze guztien “suspentsioa” ere.
