Ugaldetxoko eskoletako ikasle ohiak giro ederrean elkartu dira
Hainbat urteren ondoren, 52 ikasle ohiek elkar agurtzeko aukera izan dute berriro. Egitarau betea izan dute, jarduera askorekin.
Ugaldetxoko eskoletan ibilitakoak, larunbatean, Ordozelain. Ugaldetxoko eskola zaharretako ikasle ohiak pasa den larunbatean —hilak 20— elkartu ziren. Topaketa “ahaztezina” izan zela ziurtatu dute. Ordozelai sagardotegian egin zuten bazkaria, baina egun bete-betea izan zuten, giro ederrean.
Aspaldiko lagunen lehenengo agurra Intxixu erretegian egin zuten, bertan jarri baitzuten zita. Handik, trikitilariek gidatuta, eskoletarako bidea egin zuten kalejiran, haurtzaroko ibilbidea gogoraraziz. Aldabeneko eskola zaharra pasatuta, sagardotegiraino iritsi ziren, Anduitzetik barrena.
Udaberriko giroak lagunduta, elkarri pasarte zaharrak kontatzen joan ziren bidean. Bazkaria giro “ezin hobean” egin zuten, eta etorri ez zirenak ere gogoan izan zituzten. Sagardotegian argazki zaharrak jarri zuten, erakusketa gisa, eta haiei begira memoria freskatu ahal izan zuten.
“Ondoren, kupel artean, euskal abesti batzuen ondoren, bertso idatziak abestu genituen, eskolako pasadizoak gogoratuz. Une oso hunkigarria izan zen”, jakinarazi dute antolatzaileek [Bertsoen lehen zatia eta bigarren zatia irakur daitezke].
Trikitilarien doinuekin dantzan, ilunabarrean bukatu zuten topaketa. “Egun borobila izan zen, eta hurrengoaren gogoz geratu ginen”.
