Maiatzaren 2an zabalduko dute Pasaiako udaleku irekietan izena emateko epea
Maiatzaren 15a izango da izena emateko azken eguna. Matrikulak online bidez edo HAZ bulegoan egin daitezke.
Haurrak, Mater ontzian, iazko udalekuetan. Pasaiako Udaleko Haur, Nerabe eta Gazteen Sustapen Sailak jakinarazi du datorren astean zabalduko dutela udaleku irekietan izena emateko epea. Urtero bezala, denetik izango da: tailerrak, jolasak, eskulanak, txangoak, igerilekura eta hondartzara irteerak… Udalekuak uztailaren 1etik 30era izango dira, astelehenetik ostiralera, 9:30etik 13:00etara. Dena den, uztailaren 25n eta 26an ez dela udalekurik izango aurreratu dute.
Maiatzaren 2an (osteguna da) zabalduko dute matrikulatzeko epea eta maiatzaren 15era bitarte (asteazkena da) izango da horretarako aukera. Plaza kopurua mugatua izango dela jakinarazi dute, 320 izango dira guztira. Kopuru hori gaindituz gero, zozketa egingo da. Matrikula 79,50 eurokoa izango da eta ordainketa haurraren izenean egin beharko da, kontu korronte honetan: Kutxabank ES55-2095-5400-02-1061652334. Familia errentaren arabera hobariak izango dira.
Matrikula orriarekin batera, ordainagiria eta haurraren osasun txartelaren kopia aurkeztu beharko da izena ematerakoan. Haur Hezkuntzako haurrei dagokionez, nortasun agiriaren edo familia liburuaren kopia aurkeztu beharko dute haien gurasoek.
Izen emateak zuzenean online bidez edo HAZ bulegoan egin daitezke.
