Topa egiteko gogotsu dira antxotarrak
Aurtengo Antxoberfest jaiaren gaineko xehetasunak eman dituzte antolatzaileek. Maiatzaren 9tik 11ra, ia estilo guztietako garagardoak dastatzeko aukera izango da Ibaiondon.
Iazko Antxoberfest-en ateratako irudi bat. Garagardo zaleak adi egon daitezela, maiatzaren 9tik 11ra egingo baitute aurtengo Antxoberfest azoka, Ibaiondo izango da agertoki nagusia. Kolorezko jaialdi bat izango dela aurreratu dute antolatzaileek eta denek izango dutela txoko bat: “Esan dezakegu ia estilo guztiak ondo ordezkatuta ditugula. Lager freskoetatik Inperial Stout indartsueneraino, IPA usaintsu eta zaporetsuetatik pasatuz eta bai, garai garagardoa ere izango dugu. Denontzako garagardoa dago: glutenik gabeko garagardoak ditugu, laktosarik gabeak, beganoak… Ah! eta sorpresa bat larunbateko azkenbururako…”, esan dute antolatzaileek.
Aurtengoa irekitzeko dastaketa “esklusiboa” egingo dutela aurreratu dute. Erik Coena adituarekin ariko dira pasaitarrak. 18:00etan izango da hori, gunearen irekiera baino lehen (20:00etan izango da irekiera). Txartelak (18 euroan) Ibaiondo kantinan edota Antxoberfesten sare sozialetan eskura daitezke. Garagardo txekiar, alemaniar, belgikar eta etxeko bat dastatzeko aukera izango da adituarekin, ondorengoak: Pilsner Urquell, Weihenstephan Hefe, Dubbelganger, Weihenstephan Braupakt eta Urederra.
Antolatzaileek nabarmendu dute “inguruko garagardo azokarik onena” dela Antxoberfest, eta aurten ere hala dela erakutsiko dutela. “Zer hobe gozatzeko garagardo bat hartzea baino, lagunekin, familiarekin edo sabelean tximeletak sortzen dizkizun pertsona horrekin”.
Jatekorik ere ez da faltako asteburu horretan. Txerri ukondoak, saltxitxak, patata purea, oilasko hegalak… Sabelak betetzeko denetik izango da ere. Eta azoka biribiltzeko, kontzertuak ere izango direla aurreratu dute.
