Iñigo Legorburuk hiru sari lortu ditu aste berean
Deba 100 hitzetan-en euskarazko eta gaztelaniazko modalitateak irabazteaz gain, Euskadiko Itsasargien Lagunaken bigarren postua lortu du.
Iñigo Legorburu, sariekin. Iñigo Legorburu errenteriarrak hiru sari lortu ditu mikro kontakizun lehiaketetan, aste berean. Deba 100 hitzetan lehiaketan euskarazko zein gaztelerazko modalitateetan gailendu zen, eta Euskadiko Itsasargien Lagunak elkartearen urteroko lehiaketan, berriz, bigarren postua lortu zuen.
Deba 100 hitzetan lehiaketako xedea Debarekin zerikusia duten ehun hitzetik beherako lanak saritzea da, eta Legorburu Tenoreak lanarekin gailendu zen, gerra osteko Eresoinka konpainian jardun ziren bi debarren aipamenarekin. Bere lanagatik 300 euro lortu zituen.
Hori gutxi balitz, ordea, gaztelaniazko atalean ere Legorburu izan zeren buru Aperturas y… klabadak! lanarekin. Jon Esturo debar xakelariaren istorioa azaldu zuen Legorburuk bertan xakearen inguruko hitz “bereziak” erabiliz. Lan honengatik ere Legorburuk 300 euroko beste sari bat lortu zuen.
Horietaz gain, Euskadiko Itsasargien Lagunak elkarteak urtero antolatzen duen lehiaketan ere izan zuen protagonismoa errenteriarrak, bigarren postua eskuratu baitzuen. Itsasargiak ardatz izanik, Legorburuk Hormak lana aurkeztu zuen, eta sari gisa elkartearen liburu, oroigarri eta merchandisinga lortu zituen. Legorbururen mikro kontakizuna zein beste sarituenak ere irakur daitezke elkartearen webgunean.
