Arpide bidea konpontzeko lanak, bukatuta
Gurutzetik Ergoien auzora doan errepidea konpondu du udalak. Hainbat moldaketa egin ditu bertan, 77.000 euroko inbertsioarekin.
Arpide herribideak Ergoien eta Gurutze lotzen ditu.
Oiartzungo Udalak jakinarazi duenez, Gurutzetik Ergoien auzora doan Arpide bidea berritzeko lanak bukatu dituzte. Bi auzoak zuzenean lotzen ditu herribide horrek, 1,2 kilometroko luzera duena. Trekutik barrena doan errepideak dituen arazoen jatorria azaldu du udalak: erabilera eta euri eta inguruko iturrietako uren ondorioz sortutako pitzadurak.
Zuloak konpondu, zoladura azpian urak behar bezala bildu eta bideratzeko hoditeria sarea egin, asfaltatu eta abiadura moteltzeko gomazko badenak jarri dituzte. Udalaren inbertsioa 77.370,90 eurokoa izan dela adierazi dute.
