«Ontzi hau uretaratzea mugarri bat izango da guretzako»
Almonacid aita-seme txiletarrak belaontzi bat eraikitzen ari dira Albaolan. Beren sorterrian egiten duten lana badian erakutsiko dute hilaren 10ean. Ohorezko gonbidatu da Txile.
Hugo Almonacid eta Hugo Almonacid aita-semeak, Albaolan. Nolatan gurutzatu duzue mundua Pasaian belaontzi bat eraikitzeko?
Calbucokoak gara, Txileko Los Lagos eskualdean dago, eta bertan eraikitzen ditugu gure ontziak. Nire aitak urte asko daramatza zeregin horretan, bizitza osoa. Haren aitarengandik ikasi zuen, nik neuk egin bezala. Txileko Kultura Ministerioaren Ondare Zerbitzuak gonbidatu gintuen hona etortzera. Erriberako zurgintza balioan jartzeko lan egin izan dugu, besteak beste.
Pasaian eraikitzen ari garen hau da horietako bat. Belaontzi bat da, chilote optimizatu bat zehazki. Daniel Bravok sortutako proiektua da, Txile hegoaldeko herritarrak bela bidezko nabigazioaz maitemintzea helburu duena. Chiloe artxipielagoko ontzi tradizionala da. Bere garaian merkantziak garraiatzeko erabiltzen zen. Oso handiak eta zabalak ziren, eta egun jendearentzat ez dira oso erakargarriak, nabigatzeko zabalegiak iruditzen zaizkiolako. Aldaketa txiki batzuen bidez chilote erakargarriagoa egitea da lortu nahi duguna.
Hilabete daramazue belaontzia eraikitzen, eta datorren asterako, Pasaia Itsas Festibalerako, prest egon behar du.
Bai, denbora errekorrean ari gara eraikitzen [barrez]. Ontzi honek bost metroko luzera du. Duela hilabete hasi ginen, eta azken txanpan sartu gara dagoeneko. Helburua da hilaren 7-8rako prest egotea, belak eta guzti. Horiek Wienecke enpresak utziko dizkigu dohaintzan.
Nolakoa ari da izaten prozesua?
Izugarria. Albaolan dauden baldintzak bikainak dira. Txilen dugun lekuarekin alderatzen badugu, hango zurginen baldintzak oso prekarioak dira. Horregatik sortu genuen sektoreko zurginen elkartea. Bertako presidentea naiz. Irabazi asmorik gabeko elkartea da, ofizioa indartzea eta langileen lan baldintzak hobetzea asmo duena. Haatik, esperientzia bikaina ari da izaten. Tresnetatik harago, hemen itsas ondareari ematen zaion garrantzia ikusteak pozez bete nau.
Hilaren 10ean itsasoratuko duzue. Momentu hori nola biziko duzue?
Oraindik lasai gaude, baina unea heltzen denean urduriago egongo garela uste dut, jende asko etortzen dela esan baitigute. Ontzia uretaratzea mugarri bat izango da guretzat eta erriberako zurgintzarentzat. Gainera, hau guztia aitarekin bizi ahal izatea zoragarria da. Egiten dugun lana erakutsi nahi dugu, eta Euskal Herria leku ezin hobea da horretarako.
