Trintxerpen ere komun autogarbigarri bat jartzeko eskatu du EAJk
Antxon eta Donibanen komun bana jartzeko proiektua aterako du lizitaziora aurki udalak. Jeltzaleek diote udal gobernua "motz" geratu dela, eta hirugarren bat jartzeko eskatu diote.
Trintxerpe eta Herrerako topoa lotzen dituen bidean jartzeko eskatu dute. Aurki bi komun autogarbigarri jartzeko lizitazioa aterako du Pasaiako Udalak, eta aurreikusitakoaren arabera, bata Antxoko Eskalantegi inguruan jarriko dute eta bestea Donibaneko pilotalekuaren azpialdean. EAJ taldea pozik agertu da albistearekin, aurreko legegintzaldian aurreikusi eta proposatu baitzuten proiektu hori haiek. Dena den, EH Bildu eta Podemosen udal gobernua “motz” geratu dela diote, haien ustez hirugarren komun bat falta baita proiektu horretan. Jeltzaleek diote Trintxerpe eta Herrerako topoaren geltokia lotzen dituen pasealekuan beste bat jarri beharko litzatekeela.
Taldekoek argudiatu dute udal gobernuak ez duela “beharrezkotzat jotzen” komun hori, “beste azalpenik gabe”. Loreto Osa taldeko bozeramaileak honakoa esan du: “uste dugu ez direla ohartzen egunero bertatik pasatzen den jende kopuruaz, parkean jolasten diren haur kopuruaz eta parkean atseden hartzen duten adineko pertsonez. Adingabeek zein adinekoek komun bat gertu izan behar dute, eta, beraz, akats larria iruditzen zaigu egungo gobernu taldea hura ez instalatzearekin itsutu izana”.
Osak gogorarazi du haien udal taldeak 2024ko aurrekontuari zuzenketa bat proposatu ziola hirugarren zerbitzu hori gehitzeko, baina zuzenketa horrek ez zuela aurrera egin. Osak “tristura eta harridura” adierazi du, “pertsona guztien zaintzaz arduratzen dela dioen gobernu batek bizilagunen beharrak kontuan hartzen ez dituelako; izan ere, ekimen txiki batekin, zerbitzu bat ezartzearekin, laguntza handia eman dakieke bi kolektibo hauei”.
Egungo udal gobernua zuzentzeko garaiz dagoela esan du azkenik Osak, eta beharrezkotzat jo du bi komunak jartzeko lizitazioa berriro egitea, eta baldintza agirietan hirugarren bat sartzea jaso liteke haien ustez. “Espero dugu EH Bilduk eta Podemosek osatutako gobernu taldeak hausnarketa egitea eta egunero gune horretara joaten diren pertsona guztientzat oso onuragarria izango den inbertsioa sartzea”.
